Лени Йоронинг "Манчестер Юнайтед"даги келажаги шубҳа остида қолди

«Манчестер Юнайтед» таркибида узоқ муддатли лойиҳа доирасида асосий ўрин тутиши кутилган марказий ҳимоячи Лени Йоронинг мақоми сўроқ остида қолмоқда.

Англия гранди 2024 йил ёзида «Лилль» клубидан 20 ёшли француз ҳимоячини 62 миллион евро эвазига сотиб олган, шартномада яна 8 миллион евролик бонуслар ҳам кўзда тутилган эди. Шунга қарамай, жорий мавсумда Йоро барча мусобақалар доирасида атиги икки марта асосий таркибда майдонга тушди. Премьер-лига учрашувларида бош мураббий Майкл Каррик марказий ҳимояда одатда Харри Магуайр ва Лисандро Мартинесга ишонч билдирмоқда.

CaughtOffside нашри маълумотича, «Манчестер Юнайтед» ҳимоя чизиғини кучайтириш учун бир вақтнинг ўзида бир неча марказий ҳимоячи номзодини кўриб чиқмоқда. Рўйхатдан «Эвертон» сафида тўп сураётган, тахминан 80 миллион фунтга баҳоланаётган Жаррад Брантуэйт, шунингдек, «Штутгарт» футболчиси Финн Ельч ва «Лечче» ҳимоячиси Тиагу Габриэл ўрин олган.

Шу билан бирга, манкунианлар ҳозирча Лени Йородан воз кечиш ниятида эмас. Келаси ойлар француз футболчиси учун ҳал қилувчи бўлиши мумкин: у берилган имкониятлардан унумли фойдаланиб, мураббийлар штаби ишончини қайта қозониши талаб этилади.