Levandovskini uch yarim baravar qimmatiga oladigan klub chiqdi

“Barselona” rahbariyati jamoaning 37 yoshli hujumchisi Robert Levandovski bilan xayrlashishga tayyorlanmoqda. Polshalik to‘purarning amaldagi shartnomasi 30 iyun kuni tugaydi.

Avvaliga kataloniyaliklar Levandovski bilan hamkorlikni avtomatik tarzda yana bir yilga uzaytirmoqchi edi. Biroq joriy mavsumda futbolchi o‘yini va samaradorligida pasayish kuzatilayotgani klubni uning o‘rniga boshqa hujumchi qidirishga majbur qilyapti.

Transfer News Live va Fichajes kabi manbalarning yozishicha, “Barselona” Levandovskini yanvar oyidayoq sotib yuborish taraddudini ko‘ra boshladi.

Ma’lum bo‘lishicha, tajribali futbolchiga Saudiya Arabistoni klubi xaridor bo‘lyapti. Shayxlar Transfermarkt portalida 10 million evroga baholanayotgan yulduz uchun 35 million evrolik taklif yubordi.

Ayni paytda kataloniyaliklar bu taklifni qabul qilishga moyillik bildirgan.