«Ливерпуль» шармандали мағлубиятга учради

«Ливерпуль» навбатдаги мавсумга тайёргарлик доирасида «Лидс»га қарши ўртоқлик учрашувида майдонга тушиб, йирик ҳисобда мағлубиятга учради – 2:4. Биринчи бўлим якунига қадар «қизиллар» 2:0 ҳисобида олдинда бораётган эди, аммо тайм орасида амалга оширилган кўплаб алмашинувлардан сўнг жамоа ўйини кескин пасайди.

Иккинчи бўлимда «Лидс» ташаббусни тўлиқ қўлга олди. «Лидс» 60-дақиқа билан 85-дақиқа орасида тўртта гол уриб, ўйин тақдирини ўз фойдасига ҳал қилди.

Бу мағлубият «Ливерпуль» учун янги бош мураббий Андони Ираола қўл остидаги илк йўқотиш бўлди. Аввалроқ мерсисайдликлар «Сандерленд»ни 4:2, «Рексхэм»ни эса 1:0 ҳисобида мағлуб этган эди.

Клубнинг навбатдаги ўртоқлик баҳси 9 август куни ўтказилади. Бу сафар «Ливерпуль»га рақиб сифатида «Монако» жамоаси майдонга тушади. 

Англия премьер-лигасида Андони Ираола бошқарувидаги жамоа мавсумни сафардаги ўйин билан бошлайди. «Ливерпул» 23 август куни «Ньюкасл» меҳмони бўлади.