“Манчестер Юнайтед” Нуралини олиб кетмоқчи

Қозоғистоннинг айрим сайтлари тарқатган маълумотларга қараганда, “Зенит” футболчиси Нурали Алип “Манчестер Юнайтед” скаутлари назарига тушган.

Манбалар Нурали Алип Қозоғистон терма жамоаси сафида Европа чемпионати саралаш турниридаги ўйинлари билан манчестерликларнинг эътиборини ўзига қаратганини ёзмоқда.

“Манчестер Юнайтед” кейинги пайтда трансферларга катта пул сарфлади, бироқ улар кутилган самарани бермади. Шу боис, клуб мутасаддилари арзон нархга яхши ҳимоячини трансфер қилмоқчи.

Мутахассисларнинг таъкидлашича, Россия футболига қўлланилаётган санкциялар туфайли Нурали Алипни тўғридан-тўғри Англияга трансфер қилиш имконияти мавжуд эмас. Чунки Англиядан Россияга пул кўчириш таъқиқланган. Шунинг учун ҳам қозоғистонлик ўйинчи аввал Туркия клубларидан бирига ўтади ва у ердан “Манчестер Юнайтед”га бориши мумкинлиги айтилмоқда.

Transfermarkt портали Нурали Алипнинг трансфер суммасини икки миллион еврога баҳолаган.