Марадонадан Роналдиньогача. Ёхуд Мексикада тўп тепган "Барселона" футболчилари

Ўтган йили Дани Алвес 38 ёшида севимли "Барселона"сига қайтиб, орзусини амалга оширди. Мавсум охирида эса клуб бразилиялик футболчи билан шартномани узайтиришдан бош тортди, шу сабабли футбол тарихида энг кўп соврин ютган футболчи яна янги клуб излашга мажбур бўлди. Унинг янги жамоаси Мексиканинг “Пумас” клуби бўлиб чиқди.

Таъкидлаш керакки, “Барселона – Мексика рейси”да бунга қадар ҳам бир қатор футболчилар жўнаб кетган. Қуйида Алвесдан олдин Мексика чемпионатига йўл олган “Барселона” футболчилари билан танишиб ўтамиз.

ХУАН МАНУЭЛЬ АСЕНСИ

70-йилларнинг ёрқин кунларини кўрган ва ўша даврнинг кўплаб юлдузлари, жумладан, Йохан Кройфф билан ўйнаш шарафига муяссар бўлган испаниялик ярим ҳимоячи Хуан Мануэль Асенси биринчи бўлиб "Барселона" – Мексика рейсидан борди. "Барселона"да ўнта ажойиб мавсумни ўтказган Асенси Мексиканинг "Пуебла" жамоасидан иқтисодий жиҳатдан жозибадор таклиф олди ва уни рад эта олмади. Орадан бир йил ўтиб, Хуан Мануэль бошқа маҳаллий клубда ўйнади. Испаниялик футболчи фаолиятида сўнгги марта "Барселона" ва "Пуэбла" клублари ўртасидаги махсус ташкил этилган ўртоқлик ўйинида майдонга тушди. Асенси шу куни икки жамоа таркибида, биттадан бўлимда ҳаракат қилди.

РАУЛЬ АМАРИЛЛА

Парагвайлик ҳужумчи "Барселона"да муҳим ўйинчига айланмади, аммо барибир каталонияликлар таркибида 54 та ўйин ўтказди ва 14 та гол урди. 1989 йилда у “Америка” клуби билан шартнома имзолади. Мексика жамоасига ўтгач, унинг фаолиятида анча яхшиланди. У “Америка” сафида 41 та учрашувда рақиб дарвозасини 22  маротаба ишғол этишга эришди.

ХОСЕ МАРИЯ БАКЕРО

Испаниялик ҳужумкор ярим ҳимоячи "Барселона" сафида 347 та ўйин ўтказиб, ўша йиллардаги каталонияликларнинг кўплаб совринларига, жумладан 1991/92 йилги Чемпионлар лигаси ғолиблигига катта ҳисса қўшган. 34 ёшида у Мексикани забт этиш учун жўнаб кетди, аммо маҳаллий футболга мослаша олмай, олти ойдан кейин фаолиятини якунлади. Кейинчалик, Бакеро мураббийликни бошлади.

ЖОВАНИ ДОС САНТОС

Гарчи дос Сантос мексикалик бўлса-да, унинг футбол йўли "Барселона" академиясида бошланган ва у ерда у тезда асосий жамоага кўтарилган, аммо жуда тез сўнган. Шундан сўнг у кўплаб Европа жамоаларида ўйнади ва 2019 йилда “Америка” билан шартнома имзолаб, ватанига йўл олди. “Америка” сафида 42 та ўйинда 4 та гол урган 33 ёшли ҳужумчи ҳозир эркин агент ҳисобланади.

БЕРНД ШУСТЕР

Немис футболчиси фаолияти давомида Испаниянинг учта гранд клуби - "Барселона", "Реал " ва "Атлетико"да ўйнаган. У 37 ёшида Мексикага йўл олган ва у ерда “Пумас” билан шартнома имзолайди. У мексикаликлар сафида атиги 6 ой ўйнаган ва 9 та учрашувда майдонга тушган. Кейинчалик у тишларини даволаш учун Европага кетган, аммо қайтиб келмаган. Шустер учун Шимолий Америкадаги энг ҳайратланарли воқеа ўйин эмас, балки Кариб денгизида чўкиб кетаётган ўсмирнинг қутқарилиши бўлган.

ХОСЕП ГВАРДИОЛА

"Барселона"нинг афсонавий футболчиси ва мураббийи Хосеп Гвардиола ҳам Мексикани четлаб ўтмаган. У "Дорадос" билан 1 йиллик шартнома имзолаган. “Манчестер Сити”ни устози Мексика клубида 10та ўйин ўтказиб, 1 та гол урган, аммо унинг бу голи жамоасининг қуйи лигага тушиб кетмаслиги учун етарли бўлмади. “Дорадос” элитани тарк этгач, Гвардиола мураббийлик лицензиясини олиш ва “Барселона”да ишлаш учун Испанияга қайтиб кетди.

ДИЕГО МАРАДОНА

Бир неча йил ўтгач, “Дорадос” Мексика футболи элитасига қайтди, аммо тезда яна қуйи лигага тушиб кетди. Кейин "Барселона"нинг собиқ футболчиси Диего Марадона клубни қутқариш учун келди ва иккита лавозим - бош мураббий ва техник директор сифатида ишлай бошлади. “Дорадос” элитага қайтишга яқин эди, аммо жамоа ҳал қилувчи плей-офф ўйинида мағлуб бўлди. Шундан сўнг аргентиналик мутахассис Мексикани тарк этди.

РОНАЛДИНЬО

2000 йилларнинг футбол тимсоли "Барселона"даги фаолиятидан сўнг "Милан", "Фламенго", "Атлетико Минейро" клубларида ўйнади ва 2014 йилда Мексиканинг "Керетаро" жамоаси билан шартнома имзолади. Роналдиньо Мексика чемпионатида жами 30 та ўйинда майдонга тушди ва 8 та гол урди ҳамда 7 та голли узатмани амалга оширди.

Sports.ru сайтидан БАХТИЁР ТОШТЕМИРОВ таржимаси.