"Машъал" Термизда "мезбон, "Сурхон" эса "меҳмон"

Бугун Суперлигада 7-тур учрашувлари бошланади. Термизнинг "Сурхон" клуби "Сурхон арена"да "Машъал"га қарши майдонга тушади.

Гарчи ўйин Термизда ўтказилса-да, "Машъал" номинал мезбон, "Сурхон" эса уйида "меҳмон" вазифасини бажаради. Бу борада ҳар икки клуб ўзаро келишиб олди. Беллашувда "Машъал" номинал мезбон бўлса-да, учрашувни ташкил этиш билан боғлиқ барча масала учун "Сурхон" клуби жавобгар ҳисобланади. Бу ҳақида ЎзПФЛ расман маълум қилган.

Нима бўлганда ҳам термизликлар ўз уйида мухлислари қаршисида тўп суради ва бу уларга устунлик тақдим этиши табиий. Биласиз, "Машъал" тўрт йиллик танаффусидан кейин Суперлигага қайтди. Албатта, клуб мухлислари учун ушбу воқеа муҳим бўлди. Мавсум олдидан жамоа бир қатор футболчиларни ўз сафига таклиф қилди ва ўз олдига юқори мақсадларни қўйди. Жамоани иқтидорли мутахассис Асрор Алиқулов бошқараётганини билсасиз. 

Айни дамда, Машъал турнир жадвалида 14-ўринда бормоқда. Жамоа 2 маротаба ғалаба қозонди ва 4 маротаба мағлубиятга учради. Тўплар нисбати - 3:11. Фақат "Машъал" стадиони таъмирланаётгани боис клуб уй учрашувларини Олмалиқда ёки рақиб майдонида ўтказишга мажбур бўляпти. Кўриб турганингиздек, навбатдаги турда ҳам муборакликлар мезбон сифатида аслида "Сурхон" майдонида меҳмон бўлади. "Сурхон" эса 6 та турдан кейин 2 ғалаба ва 4 мағлубият қайд этиб, тўплар нисбатин 5-9 ни ташкил қилган ҳолда мусобақа жадвалида 11-поғонани банд этиб турибди. Хуллас, иккала жамоанинг кўрсаткичлари деярли бир хил.

Мазкур клублар Ўзбекистон чемпионатида тарихида ўзаро 14 марта тўқнаш келган, ушбу ўйинларда кичик устунлик "Машъал" томонида. Уларнинг ҳисобида 6 та ғалаба мавжуд, шунингдек 4 та ўйинда жамоалар дурангга рози бўлишди ва яна 4 маротаба "Сурхон" ғалаба қозонди. Тўплар нисбати — 17:18 - "Машъал" фойдасига.

"Машъал"нинг охирги 5 та учрашуви:

19.04.2025. Суперлига, 6-тур: Шўртан - Машъал - 0:1 (Сардор Абдураимов)
15.04.2025. Ўзбекистон Кубоги, 1-тур: Машъал - Шўртан - 0:0
11.04.2025. Суперлига, 5-тур: Машъал - Нефтчи - 1:4  (Сардор Абдураимов)
06.04.2025. Суперлига, 4-тур: Андижон - Машъал - 1:0
02.04.2025. Суперлига, 1-тур: Пахтакор - Машъал - 5:0

"Сурхон"нинг охирги 5 та учрашуви:

21.04.2025. Суперлига, 6-тур: Сурхон - Навбаҳор - 1:0 (Кирилл Колесниченко)
17.04.2025. Ўзбекистон Кубоги, 1-тур: Андижон - Сурхон - 2:3 (Кирилл Колесниченко - пен, Муҳаммад-Али Абдураҳмонов, Достонбек Турсунов)
13.04.2025. Суперлига, 5-тур: Насаф - Сурхон - 1:0
04.04.2025. Суперлига, 4-тур: Сурхон - Қўқон-1912 - 3:1 (Муҳаммад-Али Абдураҳмонов, Диёр Рамозонов, Асадбек Каримов)
28.03.2025. Суперлига, 3-тур: Бунёдкор - Сурхон - 3:1 (Муҳаммад-Али Абдураҳмонов)

Эслатиб ўтамиз, "Машъал" - "Сурхон" ўйини 26 апрель куни "Сурхон арена"да, соат 19:00 да бошланади. Шунингдек. мазкур учрашувни "Спорт" ТВ телеканали орқали ҳам томоша қилишингиз мумкин бўлади.