Машҳур юлдуз “Барса”ни эмас, “Реал”ни танлади

“Ливерпуль” ўнг қанот ҳимоячиси Трент Александер-Арнольд келаси мавсумни қайси жамоада бошлаш бўйича қатъий қарорга келиб бўлди.

26 ёшли футболчи ўзини тарбиялаган клубнинг охирги таклифини ҳам қабул қилмади ва чемпионат якунланиши билан Ливерпулни тарк этадиган бўляпти.

Трентга “Барселона” ҳам даъвогарлик қилганди. Бироқ футболчининг танловидан кейин каталонияликлар ҳам четга чиқишга мажбур бўлди.

Эркин агентга айланиш арафасида турган англиялик ҳимоячи “Реал”ни бежизга танлагани йўқ. Унинг бу қарорга келишида Мадрид клубида терма жамоадаги дўсти Жуд Беллингем ўйнаётгани ҳам муҳим омил бўлди. Бу ҳақда Defensa Central нашри хабар берди.

Александер-Арнольд профессионал фаолиятини фақат “Ливерпуль”да ўтказган ва ҳозирга қадар жами 349 та учрашувда иштирок этган.