Мбаппе “Реал”да рақам танлади, у севимли рақамларидан воз кечди

“Реал” энг кўп кутилган трансфер – Килиан Мбаппенинг жамоага ўтганини расман тасдиқлади.

Журналист Фабрицио Романонинг ёзишича, 25 ёшли франциялик ҳужумчи Мадрид клубида ўзига рақам танлади. Унга кўра, Килиан Мбаппе ҳамюрти Карим Бензема “Реал”дан кетганидан кейин бўш турган тўққизинчи рақамда ўйнайдиган бўлди.  

Мбаппе клуб раҳбариятидан ўзи ёқтирган ўнинчи рақамни сўрамагани айтилмоқда.  Килиан Франция терма жамоасида айнан 10 рақамда ўйнайди. 

"Реал"нинг янги аъзоси ўнинчи рақамда тўп тепиб келаётган ва клубда яна бир мавсум қолишга қарор қилган Лука Модричга бўлган ҳурматидан севимли рақамига даъвогарлик қилмади.

Мбаппе ПСЖда ўйнаган 7-рақам ҳам "Реал"да банд. Бу рақам жамоа юлдузларидан бразилиялик Винисиус Жуниорга тегишли.

Мбаппенинг “Қироллик клуби” билан шартномаси 2029 йилнинг ярмигача имзоланган.