Месси аргентиналик мухлислар билан хайрлашди

Лионель Месси Аргентина терма жамоаси сафида ўзининг сўнгги уй ўйинини ўтказди.

38 ёшли ҳужумчи иккита гол уриб, жамоасининг Жаҳон чемпионати саралаш босқичида Венесуэлани 3:0 ҳисобида мағлуб этишига ҳисса қўшди. Ўйин тугагач, Месси аргентиналик мухлислар билан хайрлашиб, таъсирли нутқ сўзлади.

- Кўп йиллар ўтди, ҳар бир ўйиндан завқ олдик. Мен жуда бахтлиман. Ҳаммасини шундай якунлаш - мен доим шундай бўлишини орзу қилган эдим. Бу ерда ўйнаб, кўп нарсаларни бошдан кечирдим. Аргентинада мухлисларимиз олдида чиқиш қилиш ҳар доим ёқимли эди. Барселонада мени севишарди, бу ерда ҳам менга шундай муносабатда бўлишларини орзу қилардим, - дея маҳаллий футбол мухлислари билан хайрлашди.

Аргентиналиклар ушбу ғалабадан сўнг мундиалда иштирок учун йўлланмани қўлга киритди.