Мессининг мухлислари ўқисин!

Лионель Мессининг қарийб 17 йиллик футболчилик фаолиятида бу йилчалик кутилмаган ўзгаришлар бўлмаган. Аргентиналик юлдузнинг қадрдон “Барселона”дан кетишга мажбур бўлиши ҳатто ўзининг ҳам тушига кирмаган бўлса керак.

Вазият тақозоси билан “Барселона” Мессидан, Месси эса “Барселона”дан айрилди. Тўғри, Лео ишсиз, жамоасиз қолгани йўқ. Бугунги кунда жаҳон футболчида энг бадавлат клублардан бири ҳисобланган ПСЖдан қўним топди. Лекин аргентиналик юлдуз учун дунёнинг ҳеч бир жамоаси “Барса”чалик қадрли ва қадрдон бўлолмайди.

Месси Каталониядан кетиши билан унинг “Барселона” футболчиси сифатида қайд этган тарихий рекордлари ҳам тўхтади.

Sports.uz  портали эътиборингизга Мессининг 2021 йилда қайд этган тарихий рекордларини ҳавола этамиз. Зеро, энди бу рекордларнинг аксарияти катта эҳтимол билан ҳеч қачон янгиланмайди.

Аргетинада Мессичалик кўп ўйнаган футболчи йўқ

2021 йилнинг июнь ойи охирида Лионель Месси Аргентина терма жамоасида ўтказилган ўйинлар сонини 158 тага етказиб, бу кўрсаткич бўйича рекорд ўрнатди. Бирор аргентиналик футболчи ўз мамлакати бош жамоаси учун бунча кўп ўйин ўтказмаган.

“Олтин тўп” яна Мессида

Лионель Месси “Олтин тўп”га эга чиққанида ПСЖ футболчи эди. Бироқ, йилнинг энг зўр ўйинчисига бериладиган бу нуфузли соврин аргентиналик юлдузнинг “Барселона” ва Аргентина терма жамоасидаги меҳнатлари эвазига берилган баҳодир.

 Шу тариқа, Месси “Олтин тўп”ни еттинчи марта қўлга киритган биринчи ва ягона футболчига айланди. Бу совринни беш бор боши узра кўтарган Криштиану Роналду энди ҳеч қачон Мессига етолмайди. Бунинг учун 36 ёшли тўпурарга вақт етишмайди.

Пеленинг халқаро рекорди синди

Лионель Месси 2022 йилги жаҳон чемпионатининг саралаш турнирида Боливия терма жамоаси дарвозасини уч маротаба ишғол қилганидан кейин Жанубий Америка футболчилари ўртасида терма жамоа учун гол уриш бўйича рекордчига айланди.

Аргентиналик юлдузнинг халқаро фаолиятидаги голлари сони 80 тага етди ва у футбол қироли Пелега тегишли рекордни йўққа чиқарди.

Ўз вақтида уч карра жаҳон чемпиони бўлган Пеле Бразилия терма жамоаси учун 77 та гол урган эди.

Бунақа рекорд янгиланмайди

Лионель Месси бир лигада гол уриш бўйича ҳам Пеленинг рекордини урди. Футбол қироли Бразилия А Сериясида “Сантос” учун 469 та тўп киритган. Бу рекорд ўрнатилганида Лионель Месси ҳали туғилмаган эди. 1974 йили қайд этилган ушбу кўрсаткичга 2021 йилда барҳам берилди.

Лео “Барселона” сафида Испания Ла лигасидаги голлари сонини 474 тага етказди. Бу янги натижани қайд этиш учун Мессига 16 мавсум керак бўлди.

“Олтин тўп”га оид яна бир янгиланмас рекорд

Лионель Месси ҳар ўн йилликда “Олтин тўп”га эга чиққан ягона футболчи. Илк бор у нуфузли совринни 2009 йилда, атиги 22 ёшлигида ютганди.  

Кейинги ўн йилликда у яна беш маротаба мазкур совринни ўзиники қилди. Бу йилги соврин билан яна бир рекорд соҳибига айланди.