Миржалол Қосимов: "Ўйлайманки, бу ўйиндан мухлислар ютди"

Ўзбекистон Кубогининг гуруҳ босқичи биринчи тур доирасидаги ОКМК – “Металлург” учрашуви жанговар дуранг – 3:3 билан якунланди. Ўйиндан кейин олмалиқликлар устози Миржалол Қосимов фикрлари билан ўртоқлашди.

- Дербини гувоҳи бўлдик, қизиқарли ўйин бўлди. Ҳисоб ҳам кўрсатиб турибди. Дербига хос ўйин. Ўйлайманки, бундан мухлислар ютди, чиройли ўйин кечди. Лекин футбол 90 дақиқа ўйналади. 3:1 ҳисоби қайд этилиб турган пайтда бемалол ғалабага етказиб қўйишимиз мумкин эди. Аммо “Металлург” жамоаси ҳам жон-жаҳди билан ўйнашга ҳаракат қилди. Албатта, дуранг билан мукофотланди. Кейинги ўйинларга тайёргарлик кўрамиз. Футбол шуниси билан қизиқ.

- Кубокда ОКМК олдига қанақа вазифа қўйилган?

- Бизга фарқи йўқ: Кубок бўладими, чемпионат бўладими, ҳар бир ўйинга юракдан ўйнаймиз. Ўзимизни аудитория, мухлисларимиз бор. Улар учун ўйнаймиз. Шу сабабли ҳар бир учрашувда охиригача курашиш ва ғалаба қозониш учун ҳаракат қиламиз. Қолаверса, чиройли ўйин билан мухлислар қалбидан жой олишни хоҳлаймиз. Футбол шунақа – ютқазмайдиган жамоани ўзи йўқ.