Модрич “Реал”га қайтадими?

“Милан” жамоаси ўйнаётган Лука Модрич Мадриднинг “Реал” клубига қайтиши ҳақидаги маълумотларга муносабат билдирди.

40 ёшли футболчи ўтган йилнинг июнь ойида Мадридни тарк этган ва кейинчалик эркин агент сифатида Италия клубига қўшилган эди. “Реал” хорватиялик плеймейкерга янги таклиф беришни истамаганди.

Айни пайтда “Реал” раҳбарияти жамоа бош мураббийлигига “Милан”ни бошқараётган Массимилиано Аллегри номзодини ҳам кўриб чиқмоқда. Италиялик мутахассис Мадридга келадиган бўлса, ўзи билан Модрични олиб кетишини билдиргани айтилмоқда.

- Аллегри ва мен “Реал”га борамизми? Бунақа миш-мишлар ҳар доим бўлади, лекин бу мени қизиқтирмайди. Мен бу ерда, “Милан”да жуда бахтлиман, - деди Лука Модрич.

Жорий мавсумда хорватиялик футболчи барча мусобақаларда 30 та ўйинда иштирок этди. У бу ўйинларда икки гол урди ва учта голли узатмани амалга оширди. Модричнинг Италия клуби билан шартномаси мавсум охиригача амал қилади.

Бироқ футболчининг истагига кўра ҳамкорлик автоматик тарзда яна бир йилга узайтирилиши мумкин.