“Насаф” қай тарзда ғалаба қозонди? Ўйинда нималар рўй берди?

Осиё Чемпионлар лигаси ўтиш баҳсида “Насаф” БААнинг “Банияс” клуби билан куч синашди. Беллашувда қаршиликлар 2:0 ҳисобида зафар қучди.

“Насаф” дастлабки дақиқаларда тезкор гол уриш учун ҳаракат қилди. Аммо қаршиликлар қанотдан тўпни жарима майдонига етказиб беришда қийналди, узатмалар амалга ошишида муаммолар юзага келди. Тўп рақиб футболчиларига тегиб қолаверди.

Шундан кейин мезбонлар жонланди. Бирин-кетин вазиятлар яратилди. Ҳатто 3 бор аниқ зарба берилди. Аммо Умиджон Эргашев ишончли ўйнади.

Рақиб сафида Николас Хименес барчадан ажралиб турди. 2 та футболчини алдаб ўтишда қийналмади, дарвозага зарбалар берди. “Насаф”да эса Иван Соловьёв эркин футболчи сифатида ҳаракат қилди. Хатто у плеймейкер вазифасини яхши бажарди. Авваллари Соловьёв тўп билан ўзи катта ҳудудни босиб ўтарди. Бердиев унга вингерликдан плеймейкер ролини топширди. Натижаси 27-дақиқада кўринди. Айнан Соловьёвнинг узатмасидан сўнг чап қанот ҳимоячиси Шерзод Насруллаев жарима майдонига ёриб кириб, дарвозага тўпни жойлаб қўйди.

ОЧЛ ўтиш ўйинида ғалаба қозонган "Насаф" қайси гуруҳдан жой олди?

Иккинчи бўлимда “Насаф” ҳисобдан келиб чиқиб ҳимоявий тактика танлади. Яъни қарши ҳужум асосий қуролга айланди. Бу паллада мезбонларнинг ҳужумлари кўпайиб, хавф ортди. Буни англаган Рўзиқул Бердиев 60-дақиқада Иван Соловьёвни Суҳроб Нуруллоевга алмаштирди. Бу орқали ҳужумлари ортаётган майдон эгаларини мураббий янада тезкор футболчи билан қарши ҳужумда жазолашни мақсад қилди.

Иккинчи таймда ҳам Николас Хименес фаоллиги билан ажралиб турди. Бироқ унинг ҳаракатларини Умиджон Эргашев бартараф этди. Иқтидорли посбон тажриба тўпламоқда.

"Насаф" ОЧЛдаги 9-ғалабасига эришди. Бошқа клубларимизнинг натижалари қандай?

75-дақиқада Ҳусайн Норчаев ҳимоячиларнинг эътиборсизлиги натижасида жарима майдони ичидан дарвозани ишғол қилди. Ҳужумчи гол урганидан сўнг шу ерда эканлигини ишора қилиб қўйди. Бу “Насаф”нинг охирги ўйинларидан кейинги танқидларга жавоб бўлса, ажаб эмас.

"Сўғдиёна" илк бор ОФК кубогида ўйнайди. Бақоев шогирдлари кимлар билан куч синашади?

Сўнгги дақиқаларда “аждарлар” 3-голни уришлари мумкин эди. Бироқ Семир Смайлагич 3 метрдан дарвозага тўпни кирита олмади. Посбон хавфни бартараф этди. “Насаф” зафар қучди. Ушбу ғалаба орқали қаршиликлар “Сўғдиёна”га қувонч улашди. Чунки энди жиззахликлар ОФК кубогида қатнашади. Улуғбек Бақоев жамоаси илк бор халқаро турнирга йўл олди.

Учрашувдан мухлисларнинг кўнгли тўлди. Шу билан бирга муаммолар етарли эди. Балки ғалаба фонида бу билинмас. Бироқ ғалабалар билан бирга камчиликлар ҳам ўзимизники. Масалан, жамоа олдинга ўтганда ҳимоячилар қарши ҳужумга тайёр эмас, ортда қолиши керак бўлганлар ҳужумга берилиб кетди. Ишончли ҳимоячилар дея саналаётган “Насаф”нинг қўрғони айрим паллада босимни кўтара олмади. Яхшиямки, рақиб вазиятлардан фойдалана олмади.

"Пахтакор"нинг ОЧЛ гуруҳ босқичдаги барча рақиблари маълум (Тақвим)

Ўйиндан олдин SPORTS.uz сайтининг “youtube”даги саҳифасида Рўзиқул Бердиев мавсум бошидаги Суперкубок ва Суперлигадаги учрашувларни қурбон қилаётганини айтгандим. Яъни “Насаф” ОЧЛда гуруҳ босқичига чиқиш учун ҳамма карталарни очмади. Мураббий ўйин услубини бироз ўзгартиргани кўринганди. Булар бесамар кетмади. Бой берилган очколар ва соврин ОЧЛ фонидаги ғалабада билинмай қолади.

Ҳа айтганча, учрашувдан аввал телеграмдаги саҳифамизда аудио чат ташкил қилгандик. Ўшанда бир фойдаланувчи ўйиндаги ҳисобни нафақат тўғри топган, балки голлар қайси таймларда киритилишини ҳам аниқ айтиб берганди. Футболнинг ашаддий мухлислари шудир аслида!

Энди “Насаф” ОЧЛда “Е” гуруҳини тўлдирди. Ушбу квартетда "Ал Садд" (Қатар), "Ал Файсали" (Саудия Арабистони), "Ал Виҳдад" (Иордания) клублари мавжуд. Жамоанинг навбатдаги мақсади гуруҳдан чиқиш.