Неймар ПСЖдан кетганининг асл сабабини очди

“Ал-Ҳилол” футболчиси Неймар 2023 йилнинг ёзида кутилмаганда Европани тарк этишга қарор қилди. ПСЖ ҳужумчиси клуб билан шартномаси бўлишига қарамай, Саудия Арабистонига йўл олди.

Бразилиялик юлдуз нега бу йўлни тутганини очиқлади.

- Мен ПСЖдан кетишга қарор қилишим билан “Ал-Ҳилол”дан зўр таклиф тушди. Парижда ўзимни бахтиёр ҳис қила олмаётган эдим. Клуб ва бош мураббий мени жамоада кўришни истамас эди.

Улар бу ҳақида менга гап оча бошлади ва бир қарорга келиш вақти етиб келганди. Ўзимга “Ал-Ҳилол” таклифи маъқул бўлди. Бу ерда янги клуб, маҳаллий маданият ва миллий чемпионат билан танишдим, - деди Неймар.

Неймарнинг Осиё футболидаги фаолияти муваффақиятли чиқмади. “Ал-Ҳилол”га келганидан кейин бешта ўйинда иштирок этди. Кейин 2023 йилнинг октябрида Бразилия терма жамоаси сафида оғир жароҳат олиб, бир йилдан ортиқ даволанди.

Жорий мавсумда икки ўйинда жами 42 дақиқа тўп тепган Неймар яна шикастланиб, бир неча ҳафта даволанишига тўғри келди.