Норвегия ФИФАдан "Тинчлик мукофоти"ни топширишни тўхтатишни талаб қилди

Норвегия футбол федерацияси ФИФА президенти Жанни Инфантино устидан берилган шикоятни қўллаб-қувватлади. Бу ҳақда федерация раҳбари Лизе Клавенесс маълум қилди.

Жаҳон чемпионатига йўл олиш арафасида ўтказилган матбуот анжуманида Клавенесс ФИФАга расмий мактуб юборилганини тасдиқлади.

Норвегия футбол федерацияси инсон ҳуқуқлари бўйича фаолият юритувчи "FairSquare" ташкилоти томонидан кўтарилган масалага қўшилди. Ташкилот ФИФАнинг Этика қўмитасидан Дональд Трампга "Тинчлик мукофоти" топширилиши сиёсий бетарафлик тамойилини бузган-бузмаганини ўрганишни сўраган.

"Биз мактубни юбордик ва у аллақачон муайян сиёсий муносабатларга сабаб бўлмоқда. Аммо иш бажарилди. Биз жараённи кузатамиз, уни илгари сурамиз, учрашувлар ташкил этишни сўраймиз ва Жаҳон чемпионатидан кейин босимни янада кучайтирамиз. Бу мактуб, айниқса миллий ассоциациялардан бири томонидан юборилгани учун жиддий қабул қилинаётганига шубҳа йўқ. Будапештдаги учрашув яхши ўтди. Нега бу муаммо сифатида қабул қилиниши ва нега Норвегия учун FairSquare'ни қўллаб-қувватлаш муҳим экани ҳақида конструктив мулоқот бўлди. Бошқа федерациялардан ҳам қўллаб-қувватлаш олдик, аммо мактубни ўзимиз алоҳида юбордик", — деди Клавенесс.