Олимпиада чемпионларининг профессионал боксдаги саргузаштлари

  Сўнги вақтларда, Лотин Америка мамлакатларида (Кубадан ташқари) профессионал боксга кўпроқ эътибор қаратишмоқда ва дастлабки қадамлариданоқ мазкур йўналиш асосида тайёргарлик кўришни бошлаб юборишган. Яъни, бу борада ўзига хос мактаб шаклланган десак янглишмаган бўламиз.

 Бу қайсидир маънода тўғридек таассурот уйғотиши мумкин. Мисол учун, кўплаб мексикалик, АҚШлик профессионал йўналишдаги жаҳон чемпионлари бунга мисол бўла олади.

  Бироқ, профессионал бокс тарихига назар ташласангиз барибир ҳаваскор йўналишда “суяги қотган” чармқўлқоп усталари профида ҳам “супер” даражадаги натижаларни қайд эта олганлигига гувоҳ бўласиз ва бу анъана давом этмоқда.

  Бугун, биз Олимпиада ўйинларида ғалаба қозониб, кейинчалик профессионал боксда ҳам бутун дунёни лол қолдириб, жаҳон чемпионлик камарлари соҳибига айланган, баъзи чармқўлқоп усталари ҳақида сўз юритмоқчимиз.

Муҳаммад Али

  Шубҳасиз, бокс қироли бу борада кўзгу десак муболаға бўлмайди. У 1960 йил Рим Олимпиадасининг 81 кг вазн тоифасида олтин медални қўлга киритади. У финалда польшалик Збигнав Петшковскийни мағлуб этади.

Профессионал боксдаги натижалари эса, барчага маълум. Ушбу йўналишдаги муваффақиятлари орқали “Қирол” даражасига кўтарилди.

Леннокс Льюис (Буюк Британия)

  Ушбу тирик афсона 1988 йил Сеул Олимпиадасининг +91 кг вазн тоифасида шоҳсупанинг энг юқори поғонасига кўтарила олади. Финалда АҚШлик Риддик Боуга ҳеч қандай имконият қолдирмайди.

Профессионал йўналишда эса, супер оғир вазн тоифасининг рақобат жуда кучли бўлган даврида етакчи эканлигини исботлай олган. Ўз вақтининг афсоналари - Майк Тайсон, Эвандер Холифилд, Майкл Грант, Виталий Кличколар устидан зафар қучиб, мутлоқ чемпионликка эриша олганди.

Оскар Де Ла Хоя (АҚШ)

  Бокс оламининг “Тилла бола”си ҳам ҳаваскор боксда Олимпиада чемпионлигини қўлга кирита олган эди. У 1992 йил Барселона мезбонлигидаги ушбу турнирнинг 60 кг вазн тоифасида иштирок этган ва дуч келган рақибларининг барчасини мағлуб эта олади. Оскар финал жангида германиялик Марко Рудольф устидан зафар қучади.

Профида эса ажойиб ва муваффақиятли жанглари орқали мухлислар ёқимтойига айланади. Шунингдек, WBC, WBA, IBF, WBO жаҳон чемпионлик камарларини қўлга кирита олишга ҳам эришган.

Владимир Кличко (Украина)

  Украиналик супер оғир вазн тоифасидаги чармқўлқоп устаси ҳам ўз вақтида тўрт йилликнинг энг нуфузли турнирида ғалаба қозона олган эди. 1996 йил Атланта Олимпиадасида +91 кг вазнда иштирок этган Владимир финал жангида Тонга вакили Паэа Вольфграмни мағлуб этиб, шоҳсупага кўтарилган.

Профессионалда эса, узоқ йиллар супер оғир вазн тоифасида етакчиликни ҳеч кимга бермай келди. У WBO, IBF, WBA, IBO чемпионлик камарлари соҳибига айлана олган.

Андре Уорд (АҚШ)

  АҚШлик ушбу чармқўлқоп устаси 2004 йилги Олимпиаданинг 81 кг вазн тоифасида зафар қучган. Лекин мазкур чемпионликни ўзбек бокс иҳлосмандларининг кўпчилиги тан олмайди. Чунки у ярим финалда юртдошимиз Ўткирбек Ҳайдаров устидан шубҳали тарзда ғалаба қозонганди. Шундай бўлса-да, натижа барибир тарихда қолади.

Унинг профессионал боксдаги фаолияти ҳам омадли бўлган. Уорд иккинчи ўрта ва ярим оғир вазн тоифаларида WBA, IBF, WBO жаҳон чемпионлик камарларини қўлга кирита олганди.

Василий Ломаченко(Украина)

  Украиналик чармқўлқоп устаси 2008 йил Пекин ва 2012 йил Лондон Олимпиадасида зафар қучади.

Профессионал боксда фаолиятини бошлаган Ломаченко тез фурсатларда бу йўналишда ҳам жаҳон чемпионлигини қўлга киритди. У ҳозир амалдаги WBC, WBO ҳамда WBA чемпионлик камари соҳиби саналади.

Александр Усик (Украина)

  Украиналик яна бир ажойиб боксчи -91 кг вазнда 2012 йил Лондон Олимпиадаси финалида италиялик Клементе Руссони мағлуб этиб, шоҳсупага кўтарилади.

Профига ўтган Усик оғир вазн тоифасида мутлоқ жаҳон чемпионлигини қўлга киритади ва эндиликда супер оғир вазнда ўз фаолиятини бошлади.

Энтони Жошуа (Буюк Британия)

 +91 кг вазн тоифасида 2012 йилги Олимпиада финалида Италия вакили Роберто Камареллени мағлуб этиб, чемпионга айлана олганди.

Британиялик чармқўлқоп устаси профессионал йўналишда ҳам ажойиб натижалар қайд этмоқда.

Ҳозирда, супер оғир вазн тоифасини етакчиларидан бири ҳисобланади ва айни кунда WBA, IBF, WBO, IBO жаҳон чемпионлик камарларининг амалдаги соҳибидир.

  Албатта, бокс тарихига назар ташласангиз яна бундай муваффақиятларга эришган чармқўлқоп усталари кўплаб топилиши мумкин. Биз бу борада нисбатан омадлироқ ва юксакроқ натижалар қайд этганларига эътибор қаратдик.

Бундай натижаларга тез орада ўзбек боксчилари ҳам эришишларига ишониб қоламиз. Чунки, Ҳасанбой Дўстматов, Фазлиддин Ғойибназаров ва Шаҳобиддин Зоировлар дастлабки қадамларини ташлаб улгуришган.