Олтин медаль олишини кутмаган Диёра Келдиёрова энди қайси турнирга боришини айтди

Ўзбекистон шарафини ҳимоя қилаётган олимпия чемпиони Диёра Келдиёрова Қозоғистондаги Aktau Asian Open 2026 мусобақасидан кейин иштирок этадиган навбатдаги йирик турнирини маълум қилди. 

«Икки йиллик танаффусдан кейин яна татамига қайтиб, олтин медаль олганимдан жуда хурсандман. Ростини айтсам, бундай натижани кутмаган эдим, лекин жуда мамнунман. Энди ой охирида, эҳтимол, Абу-Дабида бўладиган Grand Slam, яъни “Катта дубулға” турнирида иштирок этарман. 

Бу мен учун катта мусобақа бўлади, энди шунга жиддий тайёргарлик кўраман. Бу ердаги беллашувлар эса мен учун синов бўлди — тайёргарлигим қай даражада, нималар керак, нималарни ўзгартиришим лозимлигини кўрдим», — деди спортчи.

Халқаро Aktau Asian Open 2026 турнири (Турар Жолдибоев хотирасига бағишланган очиқ Осиё кубоги) 17–18 октябрь кунлари Актау шаҳрида ўтказилди. Ўзбекистонлик олимпия чемпиони фарзандли бўлгани муносабати билан олинган узоқ танаффусдан сўнг илк бор расмий мусобақада татамига қайтди.

52 килограммгача бўлган вазн тоифасида куч синашган Келдиёрова дастлаб Қозоғистон вакилларидан иборат икки рақибини мағлуб этди. Финал беллашувида эса Озарбайжон спортчиси Фарида Мирзаевани муддатидан олдин енгиб, мусобақа чемпионига айланди ва олтин медални қўлга киритди.