Ўрунов “Спартак”нинг “супертрансферига” халақит қиляптими?

Россия премьер-лигасида чемпионлик учун курашиши кутилган “Спартак”нинг сўнгги икки турда беш очко йўқотиб, мусобақа жадвалида учинчи ўринга тушиб қолганидан сўнг клубга нисбатан танқид кўпайиб бормоқда.

Ёзда клуб бош директорлигига “Уфа”дан олиб келинган Шамиль Газизов танқидларга асосий нишон бўляпти. Бу биринчи навбатда, унинг селекция ва трансфер сиёсати кўпчиликка ёқмаётгани билан изоҳланади.

Аввалги бош директор Томас Цорн ўз лавозимидан кетганидан кейин унинг ҳамюрти бўлган бош мураббий Доменико Тедескога ҳам чиқиш эшиклари кўрсатилиши кутилганди. Бироқ, амалда бундай бўлмади. Клуб Шамиль Газизов худди “Уфа”даги сингари вазиятни тўлиқ бошқара олишига ишонч билдирилди.

Мутахассислар Газизов трансферларда хато қилганини таъкидламоқда. Айниқса, жамоага Александр Кокоринни олиб келингани тушунарсиз ҳолат экани айтиляпти.  Фаолияти давомида кўп можароларнинг асосий қаҳрамони бўлган ҳужумчи “Спартак”га эркин агент сифатида келган бўлса-да, унга йилига уч миллион евродан кўп маош тўланишини ҳеч ким тушунгиси келмаяпти. Чунки, Кокорин жароҳати ва ўйинга тайёр бўлмагани учун кўп муҳим учрашувларни ўтказиб юборди. Барча турнирларда жами 378 дақиқа тўп тепиб, биттадан гол ва голли пас муаллифи бўлди холос. Унинг статистик кўрсаткичлари жуда паст ва олаётган маошига ўйини умуман тўғри келмайди. Бир сўз билан айтганда, юлдуз даражасида ишонч билдирилган футболчининг ҳозирги савияси бугунги “Спартак” учун анча паст экани кўриниб қолди.

Ёзги трансферлар вақтида пул сарфлаб сотиб олинган ягона футболчи Остон Ўруновнинг “Спартак”га қўшилишини “ҳазм қилишга” қийналаётганлар бор. Бу кўп жиҳатдан ўзбекистонлик ярим ҳимоячини айнан Шамиль Газизов олиб келгани билан боғлиқ. Аслида ёзда Доменико Тедеско жамоага топ-даражадаги ўнг қанот ҳимоячиси – “Тоттенхэм” вакили Серж Орьени олишни сўраган эди. Бироқ, футболчининг оиласида юз берган фожеа бу трансферга тўсқинлик қилди. Газизов унинг ўрнига  “Челси”дан Виктор Мозесни ижарга олишни уддалагани мухлисларнинг унга бўлган ёвқарашларини бироз аритди.

Шу ўринда, клуб раҳбарияти Тедеско ва Газизовдан фарқли равишда майдон марказида Бразилияда камол топган истеъдод соҳиби Эвандерни кўрмоқчи эди. “Васко да Гама”да тарбияланган бу ярим ҳимоячи ишончли ўйинлари орқали Даниянинг “Мидтьюлланн” жамоасини илк бор Европа Чемпионлар лигасига олиб чиқди.

“Спартак” раҳбарияти шу трансферга киришган бир паллада Тедеско ярим ҳимоянинг ўнг қаноти ва марказида Остон Ўруновни синаб кўришга қарор қилди. Германиялик мутахассис Остонни кўп нарсага қодир, фақат ҳозирча бироз хомлик қилаяпти,  деб ҳисобламоқда ва унга етарлича имкон беришга тайёр. Шунингдек, бош мураббий Ўрунов  “Спартак” даражасига мослашиб олганидан кейин бу трансфер самара келтиришига ишонмоқда.

Тедесконинг Остонга бўлган айнан шу ишончи ва муносабати туфайли клуб раҳбарлари Эвандер трансферини тўхтатиб турибди. Чунки бразилиялик футболчи келадиган бўлса, ярим ҳимоя вакиллари – Крал, Зобнин, Умяров ва Ўруновдан бири ижарага бериб юборилиши керак бўлади.

- Ўрунов дарҳол асосий  таркибда ўйнатиш учун олинмаган. Унинг трансферидан мақсад яқин келажакда жамоанинг етакчисига айланадиган футболчини тарбиялашдир. Кўп инсайдерлардан олинган маълумотларга кўра, Остон Ўруновни Россия премьер-лигасининг барча грандлари ўз таркибида кўришни истаган. Фақат Газизов туфайлигина уни “Спартак” қўлга кирита олди, - деб ёзади championat.com нашри.

Мазкур нашр “Ўрунов “Уфа”да жуда кучли жиҳатларини намойиш қилди ва унинг трансфери айнан ўйини кўтарилаётган пайтда амалга оширилди. Ҳозир Ўрунов асосий таркибнинг муқим ўйинчиси эмас, лекин унинг салоҳияти катта экани, бу иқтидорни янада ривожлантириш учун вақт кераклиги ва у келажак учун харид қилинганини ҳамма тушуниб турибди”, деб таъкидламоқда.

Шунингдек, Остон Ўрунов муҳим паллада коронавирусга чалингани ва кейинчалик икки марта жароҳат олгани унинг майдондаги ўрнига ҳам таъсир қилгани сир эмас. Муҳими, Остон ҳали ёш ва ўзини кўрсатиш учун унда етарлича имконият ва вақт бор. Фақат ўзи мақсадлари сари интилишдан тўхтаб қолмаса бўлди.