Остон Ўрунов: “Реал” ва МЮда ўйнашни орзу қиламан
Ads

Жорий мавсумда ўз олдига юксак мақсадни қўйган Наманганнинг “Навбаҳор” клубида Pepsi Суперлиганинг энг ёш ярим ҳимоячиси ўйнамоқда. Бу - Остон Ўрунов. 17 ёшли хавбек “лочинлар”нинг барча ўйинларида фаол тўп тепиб, жамоасининг ғалабаларига ўзининг муносиб ҳиссасини қўшиб келмоқда. Биз Остон Ўрунов билан суҳбат уюштириб, унга ўзимизни қизиқтирган бир неча саволлар билан мурожаат қилдик. 

- Бу йилги Суперлига баҳслари сизда қандай таассурот қолдиряпти?

- Жуда яхши таассурот қолдиряпти. Барча учрашувлар қизиқарли ва кескин курашлар остида кечмоқда. Нафақат олий лиганинг номи ўзгарди, балки, ўйинларнинг савияси ҳам ошди. Бир сўз билан айтганда, Суперлига ўз номига мос равишда ўтяпти.

- Мана, 13та тур баҳслари ортда қолди. Суперлигадаги ҳар бир рақиб жамоа билан бир мартадан, “Металлург” ва АГМК клублари  билан эса ҳаттоки, 2 марта ўйнадинглар. Ортда қолган ўйинларда сиз учун қайси учрашув қийин кечди?

Ўз майдонимизда 7-тур доирасидаги “Бунёдкор”га қарши кечган баҳсда бироз қийналдик. Боиси, ўша ўйинда биринчи бўлиб, меҳмонлар ҳисобни очишди. Биз эса олдин мувозанатни тиклаб, хайриятки, ҳакам томонидан қўшиб берилган вақтда ғалаба тўпини киритиб, иродали ютуққа эришдик.

- Жорий мавсумда “Навбаҳор”нинг олдига юксак мақсад қўйилган. Клуб раҳбарияти томонидан жамоа олдига қўйилган вазифани амалга оширишда, яъни совринли ўринлар учун кураш йўлида “лочинлар”га қайси клублар рақобат кўрсатиши мумкин?

“Бунёдкор”, “Пахтакор”, “Локомотив” ва “Насаф” жамоалари клубимизга муносиб рақобат кўрсатишлари мумкин.

Сиз жорий мавсумда Суперлиганинг энг ёш ярим ҳимоячиси саналасиз. Бу сизга ортиқча босим юкламайдими?

Йўқ, аксинча бу ўзимга бўлган ишончни орттиради. Мен 16 ёшимдаёқ асосий таркибдан ўрин олишни орзу қилгандим. Худога шукр, бу орзумга ўтган йили етдим. 2017 йили “Навбаҳор” таркибида “Металлург”га қарши кечган баҳсда захирадан майдонга тушиб, олий лигадаги дебютимни нишонлагандим. Дебютим омадли чиқиб, бекободликларни 2:1 ҳисобида мағлубиятга учратгандик. Шунингдек, олий лигадаги голлар ҳисобимни ҳам ўтган йили очгандим ва Олмалиқдаги баҳсда тўп киритгандим. Афсуски, ўша голим жамоамизга ёрдам бермай, 1:2 ҳисобида имкониятни бой бергандик. Жорий мавсумда ҳам голлар ҳисобимни очишга интиляпман. Худо хоҳласа, голлар уриб, мухлислар ишончини оқлайман, деган умиддаман.

Фурсати келганида, шуни ҳам таъкидлаш жоизки, ёш бўлсам-да, менга ишонч билдириб, “Навбаҳор”нинг асосий таркибига жалб этган  Илҳом ака Мўминжоновга ўз миннатдорчилигимни билдираман. Илҳом Иброҳимович билан олдин “Пахтакор”нинг ёшлар жамоасида бирга фаолият юритгандик. Шу сабабли, Илҳом ака Мўминжонов ўтган йилнинг 2-даврасида мени “Навбаҳор”га таклиф этганида, бу таклифни иккиланмай қабул қилдим. Илҳом Иброҳимович менинг имкониятларимни яхши биларди ва ўтган мавсумда чўчимай, асосий таркибга жалб этди. Мен ҳам устозимнинг ишончини оқлаш учун интилдим. Бу йил эса мунтазам равишда бошланғич таркибда майдонга тушяпман ва мураббийларимизнинг ишончларини оқлаш, жамоамиз манфаати учун қўлдан келганича ҳаракат қиляпман.

Кези келганида айтиш жоизки, Илҳом Иброҳимович ёш бўлса-да, анча тажрибага эга мураббий ҳамда яхши руҳшунос. Биз – футболчиларни ўйинларга яхши тайёрлайди, ҳар бир шогирдининг кўнглига йўл топа олади. Бир сўз билан айтганда, Илҳом Иброҳимович ажойиб инсон ва яхши устоз. Шундай мураббийнинг қўл остида ўйнаётганимдан фахрланаман.

- Қайси жамоадошларингиз сизга ўз маслаҳатларини бериб, қўллаб-қувватлаб туришади?

- Дилшод Жабборов, Жаҳонгир Меҳмонов ҳамда Азизбек Турғунбоев мендан маслаҳатларини аяшмайди ва доимо қўллаб-қувватлаб туришади.

- Майдонда қайси футболчилар билан бир-бирларингни тушуниб ҳаракат қиласизлар?

Азизбек Турғунбоев ва Аъзам Алиев билан майдонда бир-биримизни яхши тушуниб, тўп сурамиз. Яна шуни ҳам таъкидлаш жоизки, жамоамиз аҳил-иноқ. Барча жамоадошларим билан яхши чиқишаман.

- Футболга кириб келишингиз қай тарзда юз берган?

Фурсати келганида, шуни таъкидламоқчиманки, мен оилада ўртанча фарзандман. Мендан 3 ёш катта Достон акам бор. У болалигидан миллионлар ўйинига қизиқарди ва кўча-кўйда ҳамда стадионларда кўп футбол ўйнарди. Мен ҳам акамга ҳавас қилиб, футбол ўйнашни бошлаганман. Ўн ёшимда отам қўлимдан етаклаб, Навоий шаҳридаги футбол мактабига олиб борганлар. Миллионлар ўйинидаги илк сабоқларни Абдухалил Иноятовдан олганман.

2011 йили Фарғонада футбол мактаблари ўртасида республика турнири ўтказилган. Ўша мусобақада жамоамиз 3-ўринни эгаллаган. Турнирга “Пахтакор”нинг селекционер мураббийлари ҳам ташриф буюриб, учрашувларни кузатишган. Уларга ўйиним маъқул келган шекилли, мени ўша йили “Пахтакор” футбол академиясига таклиф этишди.

Академияда ўша пайтдаги ўсмирлар терма жамоаси бош мураббийи Темур Олимхўжаев қўл остида таҳсил олдим.

2016 йили “Пахтакор”нинг ёшлар жамоасига қабул қилиндим. 2017 йилнинг 2-даврасидан “Навбаҳор” сафида тўп суряпман.

- Қайси футболчиларнинг ўйинларига ҳавас қиласиз?

Жаҳон футболидан Португалия терма жамоаси ва Мадриднинг “Реал” клуби ҳужумчиси Криштиану Роналдуга, ҳамюртларимиздан эса миллий терма жамоамиз ва Хитойнинг “Шанхай СИПГ” клуби ярим ҳимоячиси Одил Аҳмедовнинг ўйинига ҳавас қиламан ҳамда мазкур футболчиларнинг ўйинларини диққат билан кузатиб, улардан кўп нарса ўрганишга ҳаракат қиламан.  

Ўз жамоадошларингиздан ташқари, Суперлигадаги 3 нафар энг яхши амплуадошингизни айтиб бера оласизми?

Албатта. Менимча, булар – Азим Аҳмедов (“Пахтакор”), Сардор Собирхўжаев (“Бунёдкор”) ва Жавоҳир Сиддиқов (“Қўқон-1912”).

- “Навбаҳор” мухлисларига қандай таъриф берасиз?

- Жамоамизнинг мухлислари зўр. Уларнинг қўллаб-қувватлашлари сабабли, шу даражага етиб юрибман. Наманганлик мухлислар мени кўча-кўйда ҳам таниб, ҳурмат қилишади. Бир сўз билан айтганда, Наманганда футболга бўлган қизиқиш кучли ва ғалабаларимизда мухлисларнинг ҳам муносиб улушлари бор.

- 14 июнь куни Россияда навбатдаги жаҳон чемпионати старт олади. Бўлажак мундиалда қайси терма жамоага мухлислик қиласиз ва сизнингча, қайси юрт вакиллари жаҳон чемпиони унвонига сазовор бўлишади?

- Россияда ўтказиладиган ЖЧда Португалия термасига ишқибозлик қиламан ва мениимча, айнан ушбу юрт вакиллари жаҳон чемпиони бўлишади.

- Орзунгиз?

- Хориж клублари, жумладан, Испаниянинг “Реал” ва Англиянинг “Манчестер Юнайтед” клубларида тўп суриш ҳамда миллий терма жамоамиз сардори бўлиш. Ушбу орзумни амалга ошириш учун қўлдан келганича ҳаракат қиламан.

Блиц - анкета

  • Ёқтирган рангингиз?
  • Яшил.
  • Автомобил?
  • “Каптива”.
  • Рақам?
  • Мухлислик қиладиган жамоангиз?
  • Бирданига 3та клубга, яъни Испаниянинг “Реал”,  Англиянинг “Манчестер Юнайтед” ва Италиянинг “Ювентус” жамоаларига мухлислик қиламан. 

Бизнинг маълумот

Остон Ўрунов -  2000 йил 19 декабрда Навоий шаҳрида туғилган.

Футбол билан 10 ёшидан шуғулланишни бошлаган.

Биринчи мураббийи: Абдухалил Иноятов.

“Пахтакор” футбол академиясида таҳсил олган.

Республика олимпия захиралари коллежи талабаси.

Амплуаси: ярим ҳимоячи.

Ўйнаган  жамоалари: “Пахтакор” (Тошкент, ёшлар жамоаси) – 2016 йил - 2017 йилнинг 1-давраси. 2017 йилнинг 2-даврасидан “Навбаҳор”да.

Улуғбек Умаров суҳбатлашди.

“Навбаҳор” ПФК матбуот котиби.