Ойбек Нарметов: Ўзбекистон кикбоксинги жаҳонда ўз ўрнига эга бўлади

Бир неча йиллар аввал, Ўзбекистон кикбоксинги жуда юқори даражага кўтарила олганди. Бунга эришилган натижалар ҳам мисол бўла олади. Бироқ, маълум вақт мобайнида бу яккакураш тури борасидаги ишлар бироз орқага кетгандек бўлди. Яқиндагина бунга ўзига хос ечим топилди. Яъни, аввал Ўзбекистон кикбоксингининг раҳбари сифатида ишлаб ва баъзи сабабларга кўра, бу постни тарк этган Ойбек Нарметов яна қайтадан Ўзбекистон кикбоксинг ассоциацияси раиси этиб тайинланди. 

Ушбу раҳбар бошчилигидаги терма жамоа аъзолари яқиндагина Туркияда ташкил этилган халқаро Европа кубоги очиқ турнирида иштирок этди ва 4 та олтин ҳамда 4 та бронза медалини қўлга киритди. 

Биз ушбу турнир ва бошқа масалаларга оид саволлар билан Ойбек Нарметов билан қисқача суҳбатда бўлдик. 

Қуйида, мазур интервьюни эътиборингизга ҳавола этамиз. 

ойбек ака2

- Туркияда сиз бошчилигингиздаги терма жамоа умумий ҳисобда 8 та медални қўлга киритди. Бу биз мухлислар учун  ажойиб натижа! Раҳбар сифатида сизни ҳам ушбу кўрсаткич қаноатлантирдими?

- Умумий олиб қараганда, таъкидлаб ўтганингиздек, яхши натижа қайд этдик. Лекин ҳали камчиликларимиз кўп ва буни бартараф этишимиз керак. Ўйлайманки, ҳали улкан муваффақиятларимиз олдинда. Албатта, яқин вақтлар мобайнида Ўзбекистон кикбоксинги жаҳонда ўз ўрнига эга бўлади. 

- Умумжамоа ҳисобида қайси ўрин банд этилди?

- Иккинчи ўринни қўлга киритдик. Украинада ҳам тўртта олтин медаль бўлди. Аммо биз бронза эвазига уларни ортда қолдирдик. Юқоридаги саволингизга шу ерда ҳам мисол келтириб ўтаман. Биринчи ўринни Туркия терма жамоаси қўлга киритди. Улар 8 та олтин олди. Ваҳоланки 1,5 мингдан ортиқ спортчи иштирок этган эди. Ўзбекистон делегациясидан эса 18 та спортчи ўрин олганди. 

- Ҳозирги кунда профессионал кикбоксинг жаҳон бўйлаб жуда яхши ривожланган, "Glory", "One Championship" каби промоушенлар ташкил қиладиган профессионал жангларга мухлисларнинг қизиқиши жуда юқори. Шу нуқтаи назардан, бу йўналишга жиддийроқ эътибор қаратиш керакмикан?

- Дарҳақиқат, профессионал кикбоксингнинг рейтинги жуда юқори. Бу йўналиш аста-секин бокс ва ММАга рақобат қила оляпти. Бу борада ҳам жиддий ишлар олиб бормоқдамиз. Янада аниқроқ қилиб айтадиган бўлсак, Ўзбекистон кикбоксинг ассоциацияси қошида "Кикбоксинг ПРО" промоушенини ташкил этдик. 

- Бу жуда яхши янгиликку?

- Албатта, мақсадимиз тез-тез жанг кечаларини ташкил этиб, ҳаётини кикбоксингга бағишлаб, якунда тирикчилик учун бошқа ишларга шўнғиб кетаётган истеъдодларга имконият яратишдан иборат. Қолаверса, жаҳон кикбоксинг оммасининг эътиборини юртимизга қаратиш ва бу қайсидир маънода туризм борасига ҳам ўзимизнинг қисман хиссамизни қўшишдир. Бу оддий промоушен бўлмайди. Аксинча, жаҳон даражасига чиқаришга ҳаракат қиламиз. 

- Биламизки, ўз вақтида Олмос Юсупов, Гулбаҳор Амантаева, Шавкат Ўроқов, Тимур Муҳаммеджонов каби супер кикбоксинг усталари бор эди. Ҳозирда уларнинг натижаларини қайтара олишга қодир ёшлар кўзга ташланмоқдами?

- Жуда кўп талантли ёшларимиз бор. Албатта, санаб ўтганларингиз Ўзбекистон кикбоксингининг афсоналари ва шундай бўлиб қолади. Ёшларимиз керак бўлса, улардан ҳам юқори натижаларни қайд этишга қодир деб биламан. У вақтдаги кикбоксинг билан ҳозирдагиси ўртасида тафовут жуда катта. Бу спорт тури тобора ривожланиб, рақобат ўсиб бормоқда. Тактик услублар ва турли хил янги методлар пайдо бўлмоқда. Шундай экан, бирор-бир турнирда ғалаба қозонишни ўзи қийин. Шундай бўлса-да, бизнинг ёшларимизни улкан мувафаққиятлар кутиб турибди, деб айта оламиз ва умид қиламиз. Ассоциация раҳбари сифатида эса барча шароитларни яратиб беришга ҳаракат қиламан.

- Халқаро турнирдаги ижобий натижа жаҳон кикбоксинг мутасаддиларини яна Ўзбекистонга эътиборини қаратишга сабаб бўлгандир?

- Албатта, бутутнжаҳон кикбоксинг оммаси кўрсатган натижаларимиздан хайратда қолганини яширмади. Чунки жуда савия ва натижаларимиз пасайиб кетган эди. Жаҳон кикбоксингининг раҳбарлари билан кўришдим ва уларни олдимизга қўйган мақсадларимиз билан таништирдим. Кўплаб масалаларда келишувга эришдик. Хуллас, уларнинг яна ўзбек кикбоксингига бўлган ишончини қайтара олдик. Энг асосийси катта турнирларни юртимизда ўтказиш борасида ҳам келишиб олдик. 

- Келинг, ушбу мавзу ҳақида ўзингиз сўз очдингиз, батафсилроқ маълумот берсангиз. Яқин кунларда юртимизда қандай катта турнир ташкил қилиш ниятидасиз?

- 15-21 июнь кунлари Тошкент шаҳрида кикбоксинг - WAKO бўйича "Ўзбекистон Опен" халқаро турнири ташкил этилади. Мақадимиз мазкур турнирни ажойиб тарзда ўтказиш ва қайсидир маънода бу юртимизда Осиё ва жаҳон чемпионатларини ўтказишимиз учун ўзига хос кўргазма вазифасини ўтайди. Юқорида таъкидлаб ўтганимиздек мақсадимиз жиддий ва бу борада меҳнатдан асло қочмаймиз. 

- Қайси вилоятлар бу яккакураш турининг ривожи ва оммавийлиги жиҳатидан етакчилар қаторида эътироф этилади?

- Андижон, Наманган, Фарғона умуман водийда яхши ривожланган. Бухорода Музаффар Раджабов бошчилигида жадал суръатларда ривожланиб бормоқда ва жуда кўплаб маҳоратли ёшлар етишиб чиқмоқда. Умуман олганда ҳар бир вилоятларда эътибор юқори. Биргина Хоразм ва Қорақалпоғистонда бирз сустроқ ва бу борада ҳам ўзимизнинг режаларимиз мавджуд. 

- Мазмунли суҳбат учун раҳмат ва ўз олдингизга қўйган мақсадларингиз амалга ошишига тилакдошмиз!

- Эътибор учун миннатдорман!

Ойбек ака1

Матнда хатолик топсангиз, ўша хатони белгилаб, бизга жўнатинг (Ctrl + Enter)

Минбар

Барча блоглар