Ўзбекистонлик муайтай устаси ММАда дебют қилади

Ўзбекистонлик муайтай устаси, ҳозирда ушбу спорт турининг профессионал йўналишида ажойиб натижалар қайд этаётган Мавлуд Тифиев ММАда дебют жангини ўтказади. “Thai Fight” чемпиони ҳисобланувчи юртдошимиз 28 ноябрь куни Германияда марокашлик Редуан Букерчга қарши ярим енгил вазн тоифасида Европа чемпионлик камари учун октагонга кўтарилади. Мазкур жанг IFC турнири доирасидан ўрин олган. Биз мазкур воқейликка аниқлик киритиш мақсадида спортчимизни ўзи билан боғландик.

- Тўғри, ММАда дебют қиламан. Хабарингиз бор, Таиланднинг жаҳонга машҳур “Tiger Muaytay” клуби аъзоси саналаман. Бу ерда кўплаб, ММА жангчилари фаолият олиб боришади. Тўғриси, бу йўналишда жанг қиламан, деб ўзим айтганим йўқ. Менежерларим таклиф қилишди. Чунки, ёшлигимдан “партер”да яхши ҳаракат қилардим. Бу ерда UFC жангчилари Майрбек Тайсумов, Рафаэль Физиев, Арман Царукян билан спарринг жангларда иштирок этиб, янада бу борадага маҳоратимни оширдим. Аслида, “One Championship” промоушенида аллақачон жанг қилишим керак эди. Лекин пандемия сабаб, бу жангим қолдирилди. Ваҳоланки, бу промоушеннинг ўзи менга қизиқиш билдирганди. Германиялик ва қозоғистонлик менежерлар билан ишлайман. Улар менга Германиядаги ушбу жангни ташкил қилиб беришди. Илк уринишимдаёқ титул учун жанг қиламан. Албатта, бунга анча вақт бор. Агар, карантинлар якунланиб, одатий ҳаёт тарзига қайтсак, бу жангга қадар, “Thai Fight”даги чемпионлик камаримни ҳимоя қилишим ёки  “One Championship”да жанг қилишим ҳам мумкин. Қолаверса, UFC варианти ҳам бор. Хуллас, яқин кунларда яна янгилик бўлиб қолиши мумкин.