PFL ғолиби қанча гонорар олади?

Россиялик таниқли менежер Александр Скаредин "MMA.Metaratings.ru" сайтига берган интервьюсида PFL жангчиларига гонорар тўлаш тизимидаги эҳтимолий ўзгаришлар ҳақидаги миш-мишларга изоҳ берди.

“PFL да ҳамма нарса стандартлашган. Мавсумда қатнашиш шартномаси барча учун бир хил. Шартномангизда ёзилган суммага кўра гуруҳ босқичидан гонорар тўланади. Плей-оффга чиққанингизда, миллион доллар миқдори бир нечта жангларга тақсимланади. Мавсум давомида ва плей-оффдаги барча ўйинларда ғалаба қозонсангизгина миллионга эга бўласиз. Ҳар бир финалчи одатда 100 минг ва ғолиб эса 500 минг долларга яқин пул ишлаб олади. Яъни умумий миқдор бир миллион долларга тенг. Бу схема PFL да жуда узоқ вақтдан бери мавжуд” - дейди Скаредин.