Платини Инфантино ва ФИФА амалдорларини судга берди

Европа футбол уюшмасига (УЕФА) собиқ раҳбарлик қилган Мишель Платини Париж судига жиноий ва фуқаролик даъволари билан мурожаат қилди. У ўз даъво аризасида ФИФАнинг  бир қатор собиқ  амалдорларини, жумладан ташкилотнинг амалдаги президенти Жанни Инфантинони жавобгар сифатида кўрсатган. Бу ҳақда "Reuters" ахборот агентлиги хабар берди.

Манбаларга кўра, Платинининг судга мурожаат қилишига 2015 йилда унга нисбатан илгари сурилган коррупция айбловлари сабаб бўлган. Платини ўша пайтдаги воқеалар уни 2016 йилда ФИФА президенти лавозимига номзодини қўйиш имкониятидан маҳрум этганини таъкидламоқда.

Маълум қилинишича, Францияда ФИФАнинг собиқ юридик директори Марко Виллигер ва ташкилот аудиторлик қўмитасининг ўша пайтдаги раиси Доменико Скалага нисбатан жиноий тергов бошланган. Уларга "қасддан таъқиб қилиш ва таъсирни суиистеъмол қилиш" айбловлари қўйилган. Платини фуқаролик даъвоси доирасида ФИФАдан етказилган зарарни тўлиқ қоплашни талаб қилмоқда. Унинг фикрича, ташкилот ичида уни ўн йилдан ортиқ вақт аввал энг юқори лавозимга сайланишини тўсиш учун махсус ҳаракатлар амалга оширилган.

Эслатиб ўтамиз, 2015 йилда Швейцария федерал адлия бюроси ФИФА собиқ президенти Йозеф Блаттерга қарши жиноий иш қўзғатган эди. У Платинига 1998–2002 йилларда кўрсатилган маслаҳат хизматлари учун икки миллион швейцария франки (тақрибан 2 миллион евро) ноқонуний тўлов амалга оширганликда гумон қилинган. 2025 йил март ойида Швейцария жиноят судининг апелляция палатаси ушбу иш бўйича оқлов ҳукмини чиқарди.

2015 йил декабрида эса ФИФА этика қўмитасининг арбитраж палатаси Блаттер ва Платинини футбол фаолиятидан саккиз йилга четлатиш тўғрисида қарор қабул қилган. Кейинчалик Блаттер учун дисквалификация муддати олти йилга, Платини учун эса тўрт йилга қисқартирилган.