Prevyu. "Surxon" - "Navbahor"

O‘zbekiston Superligasining 17-turidan o‘rin olgan bahsda “Navbahor” safarda “Surxon” (Termiz) jamoasi mehmoni bo‘ladi.   

Mazkur klublar shu kungacha milliy chempionatlarimiz tarixida o‘zaro 35 marta ro‘baro‘ kelishgan. Ushbu o‘yinlarning 24 tasida “lochinlar”ning qo‘li baland kelgan (bitta o‘yinda “Navbahor”ga texnik g‘alaba yozilgan),  6 tasida termizliklar g‘alaba qozonishgan bo‘lsa, 5 ta bahsda esa jamoalar murosa ko‘chasini tanlashgan. To‘plar nisbati – 86-26, “Navbahor” foydasiga.

O‘zaro uchrashuvlarda “Navbahor” 77 ochko, “Surxon” esa 23 ochkoni qo‘lga kiritgan. 

Ushbu jamoalar o‘rtasidagi o‘yinlardagi eng yirik - 9:0 hisobi 1997 yili Namanganda qayd etilgan. Ta’kidlash joizki, namanganliklar o‘tkazilgan 35 ta bahsning 12 tasida termizliklar ustidan yirik hisobda zafar quchishgan. 

Mazkur klublarning shu kungacha Termizda bo‘lib o‘tgan 17 ta o‘yinidan 7 tasida “Navbahor” g‘alaba qozongan bo‘lsa, 6 tasida “Surxon” zafar quchgan, 4 ta bahsda durang qayd etilgan. To‘plar nisbati – 29:20, "Navbahor" foydasiga.

Mazkur jamoalarning 1-davrada Namanganda bo‘lib o‘tgan bahsida jangovar durang – 2:2 hisobi qayd etilgan, o‘sha bellashuvda “Navbahor”ning gollariga Azimjon Ahmedov va Toma Tabatadze, mehmonlarning gollariga esa Sunnatilloh Xamidjonov hamda Jahongirbek Abdusalomovlar mualliflik qilishgandi.   

Eslatib o‘tamiz, “Curxon” – “Navbahor” jamoalari o‘rtasidagi uchrashuv 26 avgust kuni Samarqanddagi “Dinamo” stadionida soat 20:00 da start oladi.

"Navbahor" matbuot xizmati.