Қаршининг афсонаси

Бир вақтлар “Футбол-эркаклар спорти” деган тушунча жамият онгида илдиз отган эди. Аммо бу чегараларни дадиллик, жасорат ва ирода билан бузган қизлар ҳам анчагина. Улар тўп ортидан югурар экан, атрофдагиларнинг турли хил нигоҳини эмас, балки, ўз орзуларининг ортидан қувади. Бу ҳар бир қизнинг “Мен ҳам уддалай оламан”, деган ишончи. 

Ўзбекистонда аёллар футболининг шаклланиши 1990 йилларнинг бошларига тўғри келади. Бу даврда биринчи аёллар футбол клублари ташкил этила бошлаган. 1990 йилларнинг бошларида Тошкент шаҳрида “Спартак” номли биринчи ҳаваскор аёллар футбол клуби ташкил этилган. Бу клуб Ўзбекистонда аёллар футболининг бошланишида муҳим аҳамиятга эга бўлган. 1994 йилда эса Ўзбекистон аёллар миллий футбол терма жамоаси ташкил этилган. 1995 йилда Ўзбекистон аёллар терма жамоаси Малайзияда бўлиб ўтган Осиё чемпионатида иштирок этиб, 6-ўринни эгаллаган. Ўзбекистонда аёллар футболини ривожлантириш ва оммалаштириш мақсадида 1991 йил 8 ноябрда Ўзбекистон аёллар футболи ассоциацияси ташкил этилган. Бу ташкилот аёллар футбол клублари ва мусобақаларини бошқариш, шунингдек, аёллар футболининг ривожланишини таъминлаш билан шуғулланади. 

2003 йилнинг июнь ойида "Шўртан газ кимё“ мажмуаси директори Алишер Султоновнинг ташаббуси билан “Севинч” аёллар профессионал футбол клубига асос солинди. Дастлаб "Севинч" 2003 йили чемпионатнинг бронза медалини қўлга киритган. 2004 йилга келиб, "Севинч" қизлари ўз тарихида биринчи марта чемпионлик унвонини нишонлашди. 2006 йилдан 2017 йилга қадар Ўзбекистон чемпионлигини қўлга киритган. "Севинч“ аёллар футбол клубига 2003 йилдан буён Хан Владислав Николаевич устозлик қилиб келади. 

“Севинч” аёллар футбол клуби катта футболдан ташқари, футзалда ҳам совриндор клуб ҳисобланади. "Севинч" футзал бўйича ўн тўрт карра (2005, 2006, 2007, 2008, 2009, 2010, 2011, 2012, 2013, 2014, 2015, 2016, 2017, 2018 йиллар) Ўзбекистон чемпиони, шунингдек, футзал бўйича тўққиз карра (2009, 2010, 2011, 2012, 2013, 2014, 2015, 2016, 2017 йиллар) Ўзбекистон кубогини ҳам қўлга киритган. 2006 йилдан бошлаб клуб Ўзбекистон аёллар чемпионатида кетма-кет 11 марта чемпионликни қўлга киритди (2006–2016). 2019, 2022, 2023 ва 2024 йилларда ҳам худди шу ютуққа эришди. 

"Севинч“ аёллар футбол клуби бир қатор халқаро мусобақаларнинг совриндори ҳам саналади. 2005 йили Таиландда бўлиб ўтган, Осиё ўйинлари доирасидаги мини футбол бўйича бош соврин соҳиби бўлган. 2009 йили Россияда бўлиб ўтган "Истринская жемчужина" мини футбол бўйича халқаро турнирда бош совринни қўлга киритган. 2009 йили Иордания давлатида бўлиб ўтган мини футбол бўйича "Омон-79" халқаро турнирида ҳам зафар қучган. 2009 йили Қарши шаҳрида бўлиб ўтган мини футбол бўйича "Қарши Cуп-2009“ халқаро турнирида ҳам муваффақият қозонган. Шунингдек, улар 2009 йили Болгарияда бўлиб ўтган мини футбол бўйича Европа кубогида чемпион бўлган. 2010 йили Бирлашган Араб Амирликларида бўлиб ўтган XIV Араб ўйинлари доирасидаги мини футбол мусобақаси ғолиби, 2010 йили ўтказилган мини футбол бўйича "Омон-79" ва "Қарши Cуп-2010" халқаро турнирларида кумуш медални қўлга киритган. 2010 йили Европа кубогида бронза медалини қўлга киритган. 2019 йил 7 март куни "Севинч“ аёллар футбол клубига 200 миллион сўм мукофот пули ўтказиб берилди. “Севинч” ўз уй ўйинларини Қарши шаҳридаги “Геолог” стадионида ўтказади. Бу стадион 1983 йил 1 майда очилган бўлиб, 11 000 томошабинни сиғдира олади. Стадионда фитнес заллари, сузиш ҳавзаси ва пляж футболи майдонлари мавжуд. 

2024–2025 йилги мавсумдан бошлаб АFC Аёллар Чемпионлар Лигаси расмий равишда ташкил этилди. Бу турнир Осиё аёллар футбол клублари учун энг нуфузли мусобақа ҳисобланади. "ПФC Севинч" 2024 йилги Ўзбекистон аёллар чемпионатида ғолиб чиқиб, ушбу ютуқ орқали АFC Аёллар Чемпионлар Лигасида иштирок этиш ҳуқуқини қўлга киритди.2021 йилнинг 1 декабрь куни "Шўртан газ кимё мажмуаси“ МЧЖ ижро органининг 018/75-сонли йиғилиш баёнига мувофиқ "Севинч" аёллар футбол клуби белгиланган тартибда қўшиш бўйича тугатилиб, футбол клубининг моддий-техник базасини янада мустаҳкамлаш, бошқарувини такомиллаштириш, клуб фаолиятини ривожлантириш, унинг нуфузини янада ошириш мақсадида "Насаф“ футбол клуби таркибига қўшилди. 2022- йилнинг 15 июнь куни "Севинч" аёллар футбол клуби уч нафар легионер футболчини ўз сафига қўшиб олди. 

Клуб Ўзбекистоннинг турли ҳудудларидан иқтидорли қизларни танлаб олиб, уларни футболга ўргатиш, тарбиялаш ва улардан миллий терма жамоа даражасида. Шу мақсадда 2023 йил 50-ўринга мўлжалланган Ўзбекистондаги илк аёллар футбол мактаби ташкил этилди. Клубнинг халқаро майдондаги иштироки Ўзбекистон аёллар футболининг ривожланишига ижобий таъсир кўрсатмоқда. 

Яқин йилларда “Севинч” каби юртимиз аёллар футболининг ривожига, унинг жаҳон миқёсидаги ўрнини янада яхшилашга ўз ҳиссасини қўшадиган жамоалар сони яна ортади.