Қуйи лига жамоаси Рой Киннинг куёвини машҳур клубга бермади

Англия Чемпионшипида иштирок этаётган “Саутгемптон” ўз ҳимоячиси Тейлор Харвуд-Беллис бўйича Лиссабоннинг “Бенфика” клуби таклифини қабул қилмагани маълум бўлди.

The Athletic нашри хабарига кўра, “Бенфика”нинг янги бош мураббийи Марку Силва Харвуд-Беллиснинг катта мухлиси ҳисобланади, “Саутгемптон” эса ўз юлдузини муносиб нарх таклиф қилинган тақдирда сотишга тайёр.

Бироқ “Бенфика”нинг 20 миллион евролик (17 миллион фунт стерлинг) таклифи”авлиёлар”ни умуман қониқтиргани йўқ.

Эслатиб ўтамиз, “Саутгемптон” ўтган мавсумда жосуслик можароси сабаб Чемпионшип плей-оффи финалидан четлатилган эди.

Харвуд-Беллис 2023 йил ёзида “Манчестер Сити”дан кўчиб ўтганидан бери “Саутгемптон”нинг асосий футболчиларидан бири ҳисобланади ва 2024 йил ноябрь ойида ҳатто Англия терма жамоасида ҳам дебют қилди.

Ўтган мавсумда “Манчестер Юнайтед” афсонаси Рой Киннинг қизига уйланган 24 ёшли ҳимоячи “Саутгемптон” сафида барча мусобақаларда 48 та ўйин ўтказди, жумладан, Чемпионшип плей-оффининг ҳар икки ярим финал баҳсида ҳам майдонга тушди.