Рамос Испаниянинг топ-клубини сотиб оляпти

Испаниялик афсонавий футболчи Серхио Рамос Five Eleven Capital билан биргаликда "Севилья"га эгалик қилмоқчи. Бу ҳақда Carrusel Deportivo нашрига таяниб Cadena Ser хабар берди.

Манбага кўра, "Реал" ва Испания терма жамоасининг собиқ ҳимоячиси андалусияликларни 450 млн еврога сотиб олмоқда. Қайд этилишича, ҳозирда Рамос ўз юристлари билан биргаликда клуб ҳисоботини ўрганмоқда. Ушбу босқич бир неча ой давом этиши мумкин.

Таъкидланишича, сўнгги йиллардаги ёмон натижалар акциядорларни "Севилья"ни сотишга қарор қилишга мажбур қилган. У 2003-2005 йиллар оралиғида, шунингдек, 2023/2024-йилги мавсумда Севилья клубида футболчи сифатида ўйнаган.

39 ёшли Рамоснинг сўнгги клуби Мексиканинг "Монтеррей" клуби бўлиб, у шу йилнинг декабрь ойи бошида жамоани тарк этганди. Серхио профессионал футболчилик фаолиятини давом эттириши мумкинлиги хабар қилинганди.