“Реал” ҳимоячиси Италия клубига ўтди

Мадриднинг «Реал» жамоаси таркибида тўп сурган ҳимоячи Виктор Вальдепеньяс «Фиорентина» клубига ўтди. Бу ҳақда Италия жамоасининг матбуот хизмати хабар берди.

ОАВ маълумотларига кўра, 19 ёшли футболчи «Фиорентина» билан беш йиллик шартнома имзолаган. «Реал» ушбу трансфер учун 8 миллион евро миқдорида товон пули олади. Шунингдек, футболчи кейинчалик бошқа клубга сотилса, мадридликлар трансфер суммасининг 50 фоизини қўлга киритади. «Реал» футболчини келажакда устувор тартибда қайта сотиб олиш ҳуқуқини ҳам сақлаб қолган.

«Бундай буюк клуб — «Фиорентина»га қўшилганимдан жуда хурсандман», — деди Вальдепеньяс имзолаш маросими чоғида.

Вальдепеньяс 2018 йили «Райо Вальекано» академиясидан «Реал» тизимига ўтган. У «Реал»нинг асосий жамоаси сафида дебютини 2025 йил декабрида Испания чемпионати доирасида «Алавес»га қарши ўйинда (2:1) захирадан майдонга тушиб амалга оширган.