"Реал" янги ҳимоячи сотиб олади?

"Вильярреал"га қарши баҳсда жароҳат олиб, майдонни эрта тарк этган Давид Алаба катта эҳтимол билан ушбу мавсум қайтиб майдонга тушмайди. Раҳбарият эса унинг ўрнини тўлдириш йўлларини изламоқда.

Мавсум бошиданоқ сафдан чиққан Милитао апрель ойидан жамоа сафида кўриниш бериши айтилмоқда. Айни пайтда "қаймоқранглилар"нинг жароҳат олмаган иккита (асосий) марказий ҳимоячиси қолди. Булар Начо ва Антони Рудигер. Шунингдек, Карло Анчелотти вақти-вақти билан академиядаги айрим ўйинчиларга мурожаат қилиб турибди. Аммо олдинда жамоани Чемпионлар лигаси плей-офф ўйинлари кутмоқда. Бундан ташқари, Испания суперкубоки ва Ла Лигада чемпионлик учун ҳаракат қилаётган клуб учун мудофaa кучлироқ бўлиши керак. Ваҳоланки, икки ҳимоячининг зич тақвимда жароҳат олмаслигига ҳам ҳеч ким кафолат бермайди. 

Испаниянинг айрим нашрлари "Реал" қишки трансферлар ойнасида битта ҳимоячи билан шартнома имзолаши ҳақида хабар берди. Ҳатто вариантлар ҳам тузилди, улар орасида "Бенфика" аъзоси Антониу Силва фаворит, дейилди. Аммо сўнгги маълумотлар мадридликлар трансфер амалга оширган тақдирда ҳам қайсидир ҳимоячини ижарага олишини англатмоқда. Гап эса тажриба ҳақида кетяпти. Ҳозир ҳеч ким муҳим футболчисини ижарага беришни истамайди, 6 ойлик ўйин амалиёти учун "Реал" академиядан ҳам футболчи олса бўлади. 

Раҳбарият иккига бўлинган, кимлардир янги ҳимоячи олиб келиш кераклигини айтса, бошқалари ҳеч қандай трансферга ўрин йўқлиги, керак бўлса, ҳимояда Орельен Тчуамени, Ферлан Менди каби ўйинчилардан фойдаланишни маъқул кўрмоқда. Агарда клуб трансферга қўл урмаслик вариантида тўхталган бўлса, таваккалга қўл урган бўлади, чунки "Реал"ни олдинда катта ўйинлар кутиб турибди. 

"Marca" нашри хабар беришича, Начонинг ўрнига энг муқобил вариант сифатида кўрилаётган Марвел ҳам 3 ойга сафдан чиқди. Шу хабардан кейин раҳбарият янги трансфер амалга оширишга қарор қилиши мумкин. Айтганча, клубнинг ижарадаги футболчиси Рафа Марин ортга қайтмоқчи. У мазкур мавсум "Алавес" таркибида 15 та ўйинда майдонга тушди. Испаниялик футболчи имконият берилишини хоҳлайди ва чақирув бўлса, "Реал" сафига бориб қўшилишга тайёр. 

Маълумот учун, Мадрид клуби ҳозирча ҳеч қайси жамоа билан музокаралар олиб бораётгани йўқ.