Rodrigo “Siti”ni emas, raqibni tanladi

“Real”ning braziliyalik legioneri Rodrigo Goes bosh murabbiy Xabi Alonso o‘yin amaliyotini kafolatlamaganidan keyin boshqa klubga o‘tishga rozi bo‘lgan.

Bu ma’lumot tarqatilganidan keyin Angliya Premer-ligasining baquvvat klublari 24 yoshli hujumchiga og‘iz sola boshladi.

Yaqingacha Rodrigo uchun kurashda “Manchester Siti” favorit edi. “Shaharliklar” o‘yinchiga besh yillik shartnoma taklif qildi va “Real”ga 100 million evro atrofida badal puli to‘lashga roziligini ma’lum qildi.

Biroq, bir necha manbalar, xususan ESPN jurnalistlarining xabariga ko‘ra, Rodrigo Xosep Gvardiola jamoasiga emas, balki “Liverpul”ga o‘tishni ma’qul topgan.

Rodrigo o‘tgan mavsum “Real” safida barcha turnirlarda 54 ta o‘yin o‘tkazib, raqiblar darvozasini 14 marotaba ishg‘ol qilgan va jamoadoshlariga 11 ta golli pas uzatgan.