Роналдудан нохуш хабар

Саудия Арабистони чемпионлиги учун курашаётган “Ан-Наср” клуби бош мураббийи Жорже Жезуш жамоа тўпурари Криштиану Роналдунинг жароҳати ҳақида фикр билдирди.

41 ёшли футболчи бу жароҳатни Саудия Арабистони Про-лигасининг 24-турида “Ал-Фейҳа”га қарши ўйинда (3:1) олган.

- Охирги ўйинда Роналду мушакдаги оғриқ сабаб майдонни тарк этди. Текширувдан кейин жароҳат кутилгандан жиддийроқ экани аниқланди ва тикланиш учун вақт талаб қилинади, - деди Жезуш.

Бош мураббийнинг сўзларига кўра, Криштиану Роналду даволаниш учун Испания пойтахти Мадрид шаҳрига йўл олган.

Мураббий жамоа унинг тезроқ майдонга қайтишига умид қилаётганини айтди.

Жорий мавсумда Роналду 26 та ўйинда 22 та гол уриб, 4 та голли узатма берган.