Руни мураббийликка қайтиш учун фақат икки клубдан таклиф кутишини айтди

«Манчестер Юнайтед» афсонаси Уэйн Руни фақат икки жамоа таклифигагина яна мураббийликка қайтиши мумкинлигини маълум қилди.

«Мен аллақачон тўртта осон бўлмаган жамоада ишладим. Энди фақат битта ҳолатда, яъни «Эвертон» ёки «Манчестер Юнайтед» таклиф қилса, қайтишим мумкин. Лекин бунинг эҳтимоли жуда кам», – деди Руни Virgin Radio эфирида.

Ундан қайси клубни танлаши мумкинлиги сўралганда, Руни кулимсираб жавоб берди:

«Қайси бири биринчиси бўлиб қўнғироқ қилса, ўша», – деди у ҳазил тариқасида.

Рунининг айтишича, у умуман олганда мураббийлик фаолиятига қайтмаслиги ҳам мумкин.

«Эҳтимол, мен бошқа ҳеч қачон жамоа бошқармасман. Футболчи бўлганингда, кареранг якунланаётганини ҳис қиласан ва кейинги босқичга тайёргарлик кўришинг мумкин. Мураббийликда эса буни олдиндан билиб бўлмайди: бир йилми, икки йилми, ўн йилми ёки уч ойдан сўнг ишдан кетасанми – аниқ эмас. Менга Match of the Day дастурида ишлаш ёқади, ҳозир эса шу йўналишда ривожланишни истаяпман», – дея қўшимча қилди у.

Уэйн Руни мураббийлик фаолиятини «Дерби Каунти»да бошлаган. Кейинчалик у «Ди Си Юнайтед», «Бирмингем» ва «Плимут» клубларини бошқарди. 2024 йил декабрида «Плимут»ни тарк этган Руни шундан бери футбол бўйича эксперт сифатида фаолият юритмоқда. У хусусан Британиянинг BBC телеканалида эфирга узатиладиган Match of the Day дастурида таҳлилчи сифатида иштирок этяпти.