Сардор Азмун: "Ўзбекистон 10 киши бўлиб қолганимизда ҳам бизни юта олмади"

Жаҳон чемпионати саралашидан ўрин олган Ўзбекистон - Эрон баҳси бўлиб ўтди. 

Учрашув давомида бир нечта яхши имкониятлар бўлишига қарамай, дарвозалар ишғол қилинмади ва томонлар бир очкодан бўлишиб олишди. Меҳмонлар эса бир киши кам бўлиб қолишганди. Учрашувдан сўнг форслар етакчиларидан бири Сардор Азмун ўз фикрлари билан ўртоқлашди.

"Авваламбор Ўзбекистонга келиб қўллаб-қувватлаган мухлисларга раҳмат айтмоқчиман. Ўйин ҳақида гапирадиган бўлсам, кўрдингиз Ўзбекистон 10 киши бўлиб қолганимизда ҳам бизни енга олмади. Менда ҳаммаси жойида ва ўйнашга тайёрман. Жамоамга яна ёрдам беришим мумкин эди, аммо мураббий мени алмаштиришга қарор қилди.

Захира ўйинчиларимиз ҳам анчагина кучли футболчилар. Уларга ҳам имкон берилади. Шаҳрияр Моганлу ҳам жуда кучли футболчи. Мени айтди дерсиз, у ҳали ўзини албатта кўрсата олади.

Рақибларимизнги учрашув олдидан айтган гаплари биз учун муҳим эмас. Натижа энг муҳими. Яна бир бор айтаман: Улар бизни бир киши кўп бўлиб ҳам юта олмади. 

Бизнинг фойдамизга пенальти берилмади. Менимча ҳакам хато қилди", - деди "Шабаб Ал-Ахли" футболчиси.