Шомуродов трансфери ҳал бўлди!

Италия матбуоти “Рома” ва “Кальяри” клублари ўзбекистонлик легионер Элдор Шомуродов трансфери бўйича тўлиқ келишувга эришгани ҳақида ёзмоқда.

Рим клуби бош мураббийи Жозе Моуриньо келаси мавсум ўзи фойдаланмайдиган тўрт футболчини Португалиядаги йиғинга таклиф қилмади. Улар орасида “Специя”дан ижарадан қайтган ўзбек ҳужумчиси ҳам бор.

“Рома” мураббийлар штаби режасига киритилмаган легионеримизга бир неча клубдан таклиф бўлди. Хусусан, Грециянинг ПАОК, Россиянинг “Спартак” ва Туркиянинг “Галатасарой” клублари 28 ёшли форвардни ўз сафида кўришни истаганди.

Шомуродов ҳамон А Серияда қолиш фикридан қайтгани йўқ. Италия юқори дивизиони вакилларидан икки харидор чиқди. Аввалига “Лечче”, кейинроқ А Серияга кўтарилган “Кальяри” Элдорга оғиз солди.

Музокараларда “Кальяри” устунлик қилди. Клаудио Раньери сингари машҳур мураббий бошқараётган жамоа раҳбарият Ўзбекистон миллий терма жамоаси сардорини ижарага олиб, мавсум охирида 10 миллион еврога тўлиқ трансфер қилиш ҳуқуқини қўлга киритди. Бу ҳақда ишончли манба – La Gazzetta dello Sport нашри ахборот тарқатди.

Шунингдек, romapress.net сайти журналисти Энди Маттиоли ҳам бу маълумотларни тасдиқлаб, Шомуродов трансферига оид янги хабарни эълон қилди. Унга кўра, Элдор келаётган душанба куни Кальяри шаҳрига келиб, янги жамоаси учун тиббий кўрикдан ўтади. Ушбу кўрикдан кейин жамоалар ўзаро келишувини расмийлаштириши ва трансферни расман эълон қилиши кутилмоқда.

“Кальяри” бош мураббийи Клаудио Раньери жамоанинг ҳужум чизиғини А Серияга мослаб шакллантиришга алоҳида эътибор қаратди. Италиялик мутахассис “Сампдория” ҳужумчиси Маноло Габбьядини ҳамда “Реал” тарбияланувчиси Борха Майораль номзодларини ҳам кўриб чиқди. Шунга қарамай, “Кальяри” мураббийлар штаби ўзбек футболчисини танлади.

Айни пайтда Клаудио Раньери қўл остида икки нафар асосий марказий ҳужумчи бор. Улардан бири 34 ёшли Леонардо Повалетти Италиянинг турли лигаларида катта тажриба тўплаган. Умумий ҳисобда 430 та учрашувда майдонга тушиб, рақиблар дарвозасини 141 маротаба ишғол қилган ва 22 та ассист расмийлаштирган, Хусусан, Леонардо А Серияда 195 та ўйинда жами 60 та тўп киритган ва 12 та голли пас узатган.

33 ёшли Жанлука Лападула фаолияти давомида турли чемпионатларда тўп тепди. Умумий статистикасида клублар миқёсида 431 та учрашувда майдонга тушиб, 182 та гол ва 43 та ассист муаллифи бўлгани қайд этилган.

Лападула Италия юқори дивизионида 125 та баҳсда 34 та гол ва саккизта ассистни амалга оширган. Шунингдек, Чили терма жамоаси ҳужумчиси сифатида 27 бор беллашувларда қатнашиб, ўз ҳисобига тўққизта гол ёздириб қўйган.

Бу икки тажрибали футболчи фақат марказий ҳужумчи сифатида ўйнайди. Элдор Шомуродов улардан фарқли равишда ҳар икки қанотдан ҳужум қила олади.

Клуадио Раньери бу ҳужумчилар қаторига “Интер” вакили Гаэтано Ористаниони ҳам қўшиб олмоқчи. Италиялик мураббий режасига кўра, мана шу тўрт футболчи янги мавсумда “Кальяри” ҳужум чизиғида фаолият кўрсатиши лозим.

Шомуродов ана энди ўзига мос мураббий ва жамоа топди!