“Сити” ишончли ҳимоячи танлади

Португалия матбуоти хабарига кўра, “Манчестер Сити” ёзда ҳимоя чизиғини мустаҳкамлайди. Хосеп Гвардиола жамоаси “Спортинг” ҳимоячиси Макси Араужони сотиб олиш учун “Манчестер Юнайтед” рақобатчисига айланди.

26 ёшли уругвайлик футболчи жорий мавсумда “Спортинг”нинг энг яхши ўйинчиларидан бири бўлди. Айниқса, Чемпионлар лигасида у “Арсенал” ва ПСЖ каби кучли рақибларга қарши ўйинларда ажралиб турди.

Араужо ҳимояда ишончли ҳаракат қилиши, кўплаб тўп олиб қўйишлари ва универсаллиги билан эътибор тортган. У чап қанот ҳимоячиси сифатида ҳам, ярим ҳимояда ҳам ўйнай олади.

A Bola нашри маълумотига кўра, ҳозирча уни қўлга киритиш учун асосий даъвогарлар сифатида Манчестернинг икки клуби эътироф этилмоқда.

Аввалроқ, “Тоттенхэм” ва “Челси” ҳам футболчи вакиллари билан алоқага чиққан ва уни кузатиш учун скаутлар юборган эди.

Лиссабон клуби ҳозирча футболчини сотишни режалаштирмаяпти. Аксинча, унга юқорироқ маош таклиф қилиб, узоқроқ ушлаб қолмоқчи.

Араужонинг шартномаси 2029 йилгача амал қилади. Шартномада 69 миллион фунтлик товон пули кўрсатидган. Шу сабабли, уни сотиб олиш осон бўлмайди. Аммо Уго Виана лиссабонликлар билан яхши алоқаларга эга экани “Манчестер Сити”га бу музокараларда устунлик бериши мумкин.