“Сити” сардорини ўзим танлайман

“Манчестер Сити” бош мураббийи Энцо Мареска жамоанинг янги капитанини шахсан ўзи танлайдиган бўлди.

Марескадан олдинги бош мураббий Хосеп Гвардиола капитанни футболчиларнинг ўзлари танлашига ишонар эди. Жамоа аъзолари орасида бу масала бўйича овоз бериш ўтказиларди.

Ўтган ёзда шу тарзда “Сити” сардори Бернарду Силва бўлган эди. Гвардиола фақат етакчилар гуруҳини белгилаган бўлиб, унга португалиялик ярим ҳимоячидан ташқари Рубен Диаш, Эрлинг Холанд ва Родри ҳам киритилган.

Бу ёзда Силва эркин агент сифатида “Реал”га ўтди. The Athletic нашрининг ёзишича, янги капитанни Мареска мустақил равишда танлайди. Ҳозирча 29 ёшли Диаш ушбу лавозимга асосий номзод ҳисобланмоқда, аммо якуний қарор ҳали қабул қилинмаган.

Шунингдек, Мареска ўзининг етакчилар гуруҳини ҳам шакллантиради ва унга инглиз футболчиларидан бирини киритишни истамоқда. Қўшимча масъулиятни Фил Фоден ва Марк Гехи ўз зиммасига олиши мумкин.

Агар “Барселона” билан келишувга эришган Родри бу ёзда “Сити”ни тарк этса, Марескага етакчилар гуруҳига камида яна икки нафар янги футболчини киритишга тўғри келади.