Slot badavlat jamoani boshqarishdan bosh tortdi

«Liverpul»ning sobiq bosh murabbiyi Arne Slot Saudiya Arabistoni chempionati klublaridan biriga boshchilik qilish taklifini rad etdi.

ESPN xabariga ko‘ra, 47 yoshli niderlandiyalik mutaxassisga «Al-Ahli» rahbariyati tomonidan rasmiy taklif tushgan. Slot «Nyukasl»ga yo‘l olgan Mattias Yaysslening asosiy vorisi sifatida ko‘rilgan edi. 

Biroq «Liverpul»ning sobiq bosh murabbiyi yaqin vaqtlarda Yevropa klubidan taklif chiqishini kutishni ma’qul ko‘rgan. Shu bilan birga, ommaviy axborot vositalarida Slot Niderlandiya terma jamoasining yangi bosh murabbiyi bo‘lishi mumkinligi haqida ham mish-mishlar tarqalgan.

Eslatib o‘tamiz, o‘tgan mavsum yakunlangach, Arne Slot «Liverpul» bosh murabbiyligi lavozimidan bo‘shatilgan edi. Uning qo‘l ostidagi so‘nggi mavsumda mersisaydliklar Angliya chempionati jadvalida beshinchi o‘rinni egalladi.