"Совчилар" келяпти ёхуд "Металлург" сардорининг бозори чаққон-ку!

Мавсумлар оралиғида футболчиларнинг жамоа алмаштириши ва клубларнинг қишки йиғинларини ўтказиш жараёнлари барча мухлисларни қизиқтириши шубҳасиз. Бизда яқинда қишки трансфер ойнаси очилган ва 15 февралгача ўз кучида бўлади. Шу пайт давомида клублар таркибларини имкон қадар кучайтириш пайида бўлишлари аниқ.

Sports.uz сайти орқали клубларнинг режалари, тайёргарликлари ҳамда футболчиларга бўлаётган таклифлар хусусида маълумотлар беришда давом этяпмиз. Бу сафар яна бир кутилаётган янгилик тўғрисида ўртоқлашмоқчимиз.

Гап шундаки, “Металлург” клубининг етакчиси ва сардори ҳисобланган ярим ҳимоячи Фарҳод Бекмуродовнинг бугунги кунда бозори чаққон бўлиб қолди. 28 ёшли истеъдод соҳиби 2022 йилги мавсумни бекободликлар сафида ўтказиб, янада катта ўсишга эришди. Бежизга унга сардорлик боғичи топширилмади. Айниқса, испаниялик бош мураббий Луисма Эрнандес жамоа ўйинини Бекмуродов атрофида қурди. Натижада Фарҳод том маънода жамоасининг “мотори”га айланди-қолди. У жамоасининг ҳужумларини бошлашда ва рақиб ҳужумларини кесишда катта ҳажмдаги ишни бажарганига гувоҳ бўлдик. У “мавсум-2022”да Суперлигада 19 та, Ўзбекистон Кубогида 3 та баҳсда майдонга тушди.

Бекмуродов келаси йили Бекободда қоладими ёки клубини ўзгартирадими? Бу савол “Металлург” мухлислари учун хавотирли. Чунки улар севимли футболчисининг кетиб қолишини мутлақо исташмаяпти. Маълумот ўрнида айтмоқчимизки, Фарҳоднинг бу жамоа билан шартномаси 31 декабргача амал қилади. Бизга етиб келган ҳабарга қараганда, “Металлург” Бекмуродовни осонликча қўйиб юбормоқчи эмас. Янги шартнома имзолаш учун яхши таклиф билдирилган. Бироқ бу футболчини ўз сафида кўришни хоҳлаб турган бошқа жамоалар ҳам бор.

Жумладан, Жиззахнинг “Сўғдиёна”, Суперлигага қайтган “Турон” ва Тошкентнинг “Локомотив” клублари Бекмуродов билан жиддий қизиқишяпти. Масалан, ўтган йили “Қўқон-1912”да Бахтиёр Ашурматов қўли остида ўйнагани учун мураббий футболчининг потенциалини яхши билади. Шу сабабли бошқарувидаги “Турон”га чорламоқда. Ўз вақтида иккиси “Андижон”да ҳам бирга ишлашган. Бу ҳали ҳаммаси эмасга ўхшаяпти. Нега деганда, Бекмуродовни легионер сифатида четда кўриб қолсак ажаб эмас. Унга Малайзия тарафлардан “совчи”лар пайдо бўла бошлади. Булар ҳозирча биз билган маълумотлар, биз билмаганлари ҳам бўлса ҳайрон қолмаймиз. Иқтидорли ярим ҳимоячи ўзига келиб тушаётган таклифлар устида бош қотиряпти.

94-рақам эгаси четга кетиши ёки Суперлигада қолиши ўзига боғлиқ. Дарвоқе, Фарҳод 1994 йилда таваллуд топгани учун “Металлург”да 94-рақам остида тўп сурганини қўшимча қилиб ўтмоқчимиз.

Бекмуродов қайси клубда бўлмасин, ўша жамоани кучайтириши турган гап. Чунки у бу ишини олдин ўйнаган клубларида исботлаб бўлган. “Андижон”да порлаб чиққан футболчи кейинчалик “Локомотив” ва “Қўқон-1912” жамоаларида ўйнади. “Металлург” унинг учун тарихга айланадими ёки тарихни бирга ёзишда яна давом этадими, буни вақт кўрсатади.

Шуҳратбек Жўраев.