Суперлига охирлагани сари, мухлислар ҳам тугаб боряпти

7 ноябрь куни Суперлиганинг 24-тури ўтказилди. Натижалар билан сайтимиз орқали хабар бериб бордик.

Ушбу турда бир қатор қизиқарли ўйинлар, ўзига хос қарама-қаршиликлар кузатилди. Анча вақт пешқадам бўлиб юрган “Насаф” ўз уйида кутилмаганда “Нефтчи”дан енгилиб, учинчи ўринга тушиб кетди. Асосий рақобатчисининг қоқилиши “Пахтакор”га қўл келди ва “шерлар” Суперлига якунига бир тур қолганда 1-ўринга кўтарилди. “Аждарлар” финишда рақибларини ўтказиб юборди.

“Навбаҳор” тахмин қилинганидек Бекободда яхшигина қаршиликка учради. Яшил майдон деб бўлмайдиган қандайдир майдонда “лочинлар” жуда муҳим ғалабага эришиб, 2-поғонага чиқиб олди.

Миржалол Қосимов бошчилигидаги АГМК Тимур Кападзе шогирдларини тор-мор этди. “Сурхон” эса лига билан хайрлашган “Динамо”дан қақшатқич мағлубиятга учради. “Динамо”нинг ўйинидан самарқандликларнинг Про лигага тушиб кетгани ёдидан кўтарилган деган ҳаёлга борасан киши.

“Бунёдкор” водийда “Қўқон-1912”ни таслим этди. “Сўғдиёна” ўз уйида янги мураббий билан “Локомотив”га қарши чиройли ўйин намойиш этиб, 1 очко ишлади.

Энди эса турга оид қизиқарли маълумотларни тақдим этамиз. Яъни анъанамизга содиқ қолган ҳолда тур мухлислари статистикаси билан таништирамиз.

25-турда стадионларимизга жами 10209 томошабин ташриф буюрди. Бу ҳар бир беллашувга ўртача 1458ни ташкил қилади. Чемпионат охирлагани сари ёмғир ҳам тўхтамаяпти. Натижада стадионлар бўм-бўш. Айрим жамоаларнинг ўйинларини инобатга олмаганда, албатта.

Энг кўп мухлис Қашқадарёда. “Насаф” – “Нефтчи” баҳсини 3956 томошабин стадиондан кузатди. Қаршиликлар учун муҳим беллашувга 5 минг ҳам мухлис келмади. Бунга ёмғир баҳона бўлмаслиги лозим. Чунки “аждарлар”нинг чемпионликка жуда яқин ўйини эди.

Турнинг яна бир марказий баҳси “Металлург” – “Навбаҳор” қарама-қаршилигини 2502 ишқибоз аренадан кузатди. “Пахтакор” иштирокидаги голлар шоусини 876 одам шоҳидига айланди.

Энг кам томошабин Тошкентда. “Сурхон” бутун мавсум уй ўйинларини Тошкент шаҳри ва вилоятида ўтказди. Бу гал термизликлар “Жар”дан бошпана топди. Ушбу беллашувга 192 киши келди холос.

Қуйида Суперлиганинг ушбу турига ташриф буюрган мухлислар статистикаси билан танишинг (мухлислар сони ПФЛ сайтидан олинди):

“Насаф” – “Нефтчи” 0:1. 3956 томошабин

“Металлург” – “Навбаҳор” 0:1. 2502 томошабин

АГМК – “Олимпик” 6:0. 1443 томошабин

“Пахтакор” – “Қизилқум” 6:0. 876 томошабин

“Қўқон-1912” – “Бунёдкор” 0:1. 837 томошабин

“Сўғдиёна” – “Локомотив” 2:2. 403 томошабин

“Сурхон” – “Динамо” 1:4. 192 томошабин