Суперлигада турнинг энг чиройли голлари ТОП-10 (Видео)

29 сентябрь - 3 октябрь кунлари Суперлиганинг 20-тури ўтказилди. Натижалар билан сайтимиз орқали хабар бериб бордик.

Ушбу турда бир қатор қизиқарли ўйинлар, ўзига хос қарама-қаршиликлар кузатилди. Пешқадамликни аввалроқ бой бериб қўйган “Навбаҳор” Тошкентда кутилмаганда “Бунёдкор”дан енгилди. АГМК Жиззахда 2:0 ҳисобидаги ғалабага эришди. Бекободликлар “Қизилқум” майдонидан 3 очко билан қайтди. “Насаф” 21 йиллик нохуш анъанага барҳам бериб, ниҳоят Тошкентда “Пахтакор”ни таслим этди. “Сурхон” водийда камбэк қилишни уддалади. “Динамо” Самарқандда “Олимпик”га қарши учрашувда дуранг ўйнади. “Нефтчи” пойтахтда қийинчиликсиз зафар қучди.

Энди эса мана шу ўйинларда киритилган голлар ўнлигини тақдим этамиз.

10-ўрин Мартин Боаке АГМК

Голлар ўнлигини Мартин Боаке бошлаб берди. Аслида бу тур чиройли голларга бой бўлди. Аммо топ 10 таликнинг охиргисига яхшироқ номзод топилмади. Бироқ ундан кейинги голлар сизларга, албатта, манзур келади.

9-ўрин Мурод Холмуҳаммедов “Қўқон-1912”

Мурод Холмуҳаммедов нафақат “Қўқон-1912”даги, балки стадиондартларни амалга оширадиган Ўзбекистондаги энг яхши футболчилардан бири. Ҳимоячи бўлишига қарамай, мана шундай жарима зарбаларини кўп бор маромига етказади. Холмуҳаммедовнинг зарбасини рақиб футболчиси боши билан қайтараман деб, дарвозага кириб кетишини янада осонлаштирди.

8-ўрин Усмонали Исмоналиев “Бунёдкор”

Усмонали Исмоналиев “Навбаҳор”га гол уришни одат қилиб оляпти. Исмоналиев ўтган йили “Андижон” сафида ҳам “лочинлар” дарвозасига йўл топди. Бу сафар ҳам футболчи ўз номини таблога ёздириб қўйди.

Вазият бир қарашда ҳаммаси “Навбаҳор” ҳимоячиларининг назорати остида эди. Бироқ Боян Цигар ва Станислав Андреевнинг бир-бирига ишониб қолиши натижасида Ўткир Юсупов дарвозаси ишғол қилинди. Ҳимоячилар томошабин рўлида.

7-ўрин Рубен Санчес “Сурхон”

“Сурхон”нинг испаниялик легионери Рубен Санчес охирги пайтларда яхши ўйинлари билан жамоасига фойда келтирмоқда. Унинг голлари термизликларни қийин вазиятлардан олиб чиқмоқда. 

19-тур “Сурхон” ўз тарихида илк бор “Локомотив”ни мағлуб этганида у ҳисобни очганди. Бу гал эса термизликлар қайд этган камбэкдаги охирги голни айнан Санчес киритгани эътиборга молик. Пас ҳам жуда чиройли чиқди.

6-ўрин Марат Бикмаев “Динамо”

“Динамо” Суперлигада қолиш учун курашмоқда. Жамоанинг ишлари юришмаяпти. Самарқандликларнинг тажрибали мураббийи ва футболчилари бор. Бироқ улар ҳам жамоанинг жон сақлаш йўлида кучлари етмаяпти.

Аммо катта ўйинларни кўрган Марат Бикмаев чиройли голлар уришни билади. Дарвоза ишғол қилинган вазиятда ҳам тўпни тўхтатмасдан тўрга киритди. Ҳаммаси ҳисоб-китобли. Бикмаевдан олимпиячиларга мастер-класс.

5-ўрин Жасур Яхшибоев “Навбаҳор”

Юқорида бу тур “Навбаҳор”нинг гол ўтказиб юборишида хатога йўл қўйган Станислав Андреевни айтиб ўтгандик. Аммо у жамоадоши Жасур Яхшибоевнинг боши билан дарвозани ишғол қилишида катта ҳисса қўшди. Стаснинг узатмаси ажойиб чиқди. Чиройли комбинация, нишонга урилган узатма ва баланд бўйли Суҳроб Султоновнинг доғда қолдирилиши.

4-ўрин Забиҳилло Ўринбоев “Металлург”

Забиҳилло Ўринбоев ҳужумчи бўлишига қарамасдан жуда кам голлар уради. Лекин Ўринбоевнинг голлари муҳимлилиги билан эсда қолади.

“Металлург” ҳимоядан ҳужумни бошлади. Марказга яқинлашгач, биргина пас билан Керим Паличга имконият яратилди. Палич жарима майдони ташқарисида бўлса ҳам икки футболчи орасидан зарба берди. Тўп тўсинга тегиб қайтгунича Игнатий Нестеров томошабин бўлди. Жарима майдонига катта тезликда ёриб кирган Ўринбоев қайтган тўпни дарвозага жойлади. Нестеров яна ҳеч нарса қила олмади.

3-ўрин Иззатилла Абдуллаев “Нефтчи”

“Локомотив”га осон бўлмаяпти. Турдан-турга хавфли ҳудудга яқинлашяпти. Жамоа муаммолар гирдобидан чиқиб кета олмаяпти. Клубдаги ўзгаришлар натижага ижобий томондан таъсир қилмади. Аксинча аввалги мураббий Денис Коростиченкони қумсаганлар топилмоқда. Боз устига мана бундай голлар ўтказиб юбормоқда. Қайчи услубидаги мана бундай голни урган жамоа якунда ҳақли ғалабага эришди.

2-ўрин Дилшод Саитов “Насаф”

“Йил ўйини 2”. Футбол жамоатчилиги “Пахтакор” - “Насаф” учрашувини шундай атади. Биринчиси Наманганда “Навбаҳор” - “Пахтакор” беллашуви эди.

Турнир жадвалида қўшҳокимликни юзага келтирган бу жамоалар 20-турда ўзаро тўқнаш келди. Ўйин тақдирини ягона гол ҳал қилди. Марко Станоевичнинг пасидан сўнг Дилшод Саитов бироз олдинга чиқиб олган Санжар Қувватовнинг бўйидан тўпни тушириб қўйди. Бир қарашда тўп дарвозага рикошетдан бориб тушгандек тасуроот қолдирди. Бироқ такрорий лавҳа бунинг аксини намойиш этди. Саитовнинг зарбасини Қувватов ҳар қанча уринмасин, барибир қайтара олмади. Мукаммал зарба.

1-ўрин Исломжон Тошпўлатов “Сурхон”

Суперлигада нафақат интрига, шу билан бирга чиройли голлар ҳам ошди. Йил голи бўлишга номзод. Исломжон Тошпўлатов “Сурхон” 0:2 ҳисобида имкониятни бой бераётганда мана шу голи билан учрашувда бурилиш ясади. Бу гол меҳмонларга ижобий таъсир қилган бўлса, мезбонлар шундан кейин ўзларини ўнглай олмади.

2009 йили ЕЧЛда Криштиану Роналду “Манчестер Юнайтед” сафида “Порту”га шунга ўхшаш гол урганди. Кейин Роналду "Пушкаш" совринини қўлга киритган. Тошпўлатовнинг голи Криштиануникидан чиройли бўлса борки, асло қолишмайди. "Пушкаш" совринини Ўзбекистонга олиб келсак-а?

Ҳар қанча томоша қилса арзийдиган гол. Кўринг ва завқланинг!

Бекзод ИСАЕВ