Terma jamoa a’zolarini koronavirusga qarshi emlash masalasi muhokama qilindi

Bugun ZOOM platformasi orqali terma jamoamiz vakillarini, xususan, "Tokio-2020" Olimpiya o‘yinlarida ishtirok etadigan hamyurtlarimizni koronavirusga qarshi emlash borasida onlayn yig‘ilish bo‘lib o‘tdi. Bu haqda Milliy Olimpiya qo‘mitasi rasmiy sayti xabar bermoqda.

Tadbirni MOQ raisi Rustam Shoabdurahmonov olib bordi. Unda, shuningdek, MOQ raisi o‘rinbosari Sherzod Tashmatov, Olimpiya sport turlari bo‘yicha federatsiya va assotsiatsiyalar mutasaddilari, MOQ qoshidagi RSTIAM vakillari ishtirok etishdi. Kun tartibidagi asosiy masala sportchilarimizni koronavirusga qarshi emlash bo‘yicha barchaning fikrini o‘rganish bo‘ldi.

Dastavval, koronavirusning navbatdagi to‘lqini davrida bemorlarda uchrayotgan holatlar bo‘yicha MOQ qoshidagi RSTIAM direktorining o‘rinbosari Miralisher Islamov ma’lumot berdi. Shundan so‘ng kun tartibi bo‘yicha mutaxassislar fikri o‘rganildi. Bu borada Sherzod Tashmatov sportchilarimizni emlash fikrini ma’qulladi.

“Olimpiya o‘yinlariga tayyorlanayotgan ba’zi sport turlarda bittagina litsenzion musobaqa qolgan. Unga sportchilarimiz bilan birga ancha vaqtdan beri tayyorlanyapmiz. Xudo saqlasin, litsenzion musobaqadan avval atletlarimizdan birida musbat tahlil chiqib qolsa, hamma ishimiz chippakka chiqadi. Shu bois vaktsinatsiya qilish tarafdoriman”, – dedi MOQ raisi o‘rinbosari.

Ta’kidlash joiz, badiiy gimnastika bo‘yicha terma jamoamiz vakillari fevral oyida Rossiyada o‘quv-mashg‘ulot yig‘inini o‘tkazayotgan paytda “Sputnik V” vaktsinasi bilan sinov tariqasida emlanishgan. Yig‘ilishda O‘zbekiston gimnastika federatsiyasi raisi vazifasini bajaruvchi Ruslan Mustaev bu borada fikrlari bilan o‘rtoqlashdi:

“Sputnik V” vaktsinasi ikki komponentda qabul qilinadi. Gimnastikachilarimiz uni qabul qilishgach, bir necha kun tana haroratlarida o‘zgarish kuzatilgan. Mutaxassislarning ta’kidlashicha, bu normal holat. 4-5 kundan keyin qizlarimiz odatiy holatlariga qaytishdi va mashg‘ulotlarni davom ettirishdi. Undan so‘ng jamoamiz Moskvaning o‘zida bir qator yirik musobaqalarda ishtirok etishdi va aytishim mumkinki, vaktsina ularda hech qanday salbiy natija ko‘rsatmadi. Tajribamizdan kelib chiqqan holda biz vaktsinatsiya tarafdorimiz”.

Xalqaro Olimpiya qo‘mitasi Olimpiada uchun aynan qat’iy belgilangan vaktsinalar bo‘yicha talab qo‘ymagan. Bu borada foydalaniladigan vaktsinaning xalqaro sertifikatga ega bo‘lishi, sportchining hukumati tomonidan rasman qabul qilingan bo‘lishi lozim.

Yig‘ilish davomida Rustam Shoabdurahmonov ham o‘z xulosasini aytib o‘tdi.

“Juda murakkab vaziyatdamiz. Bu kasallik o‘zidan so‘ng nafas olish sohasida alomatlarini qoldirib ketadi. Bu esa sportchilarimiz uchun juda yomon. Agar litsenziatlarimiz kasallanib qolsa, Olimpiadagacha ularning tiklanishi qiyin bo‘lib qoladi. Emlash majburiy emas, lekin qilayotgan ishlarimizni qadrlaylik. Musobaqa yoki yig‘inlardan so‘ng sportchilarimiz o‘z bazalarida qolishsin. Ularni imkon boricha tashqi aloqadan saqlaylik. 1 aprelgacha barchangiz murabbiylar shtabi va sportchilar bilan maslahatlashib, bu borada yakuniy xulosalaringizni taqdim qilishingizni so‘rab qolamiz”, – dedi MOQ raisi.

Yakunda barcha federatsiyalarga mashg‘ulotlar davomida karantin talablariga qat’iy rioya qilish, RSTIAM shifokorlariga federatsiya bazalaridagi vaziyatni muntazam o‘rganib borish bo‘yicha ko‘rsatmalar berildi. Shuningdek, federatsiyalar mutasaddilariga "Toshkent-2025" yoshlar Osiyo o‘yinlarini qabul qilish bo‘yicha o‘z yo‘nalishlarining imkoniyati, unda ishtirok eta oladigan sportchilarning potentsiali bo‘yicha ma’lumot berish, yirik musobaqalarga jo‘nab ketayotgan terma jamoalarni qo‘llab-quvvatlash maqsadida motivatsion roliklar tayyorlash so‘raldi.