Трамп: “Менимча, Месси Пеледан кучлироқ”

АҚШ президенти Дональд Трамп Оқ уйда "Интер Майами" футбол клубини қабул қилиш чоғида флоридаликларнинг сардори Лионель Мессини бразилиялик афсонавий ҳужумчи Пеле билан таққослади.

"Мен Оқ уйда Лионель Мессини кутиб олган биринчи АҚШ президенти бўлганимдан фахрланаман! Лионель, менинг ўғлим сенинг мухлисинг. У сени ҳақиқатан ҳам катта одам деб ҳисоблайди. Келганингиз учун раҳмат! Ўйлашимча, жамоадаги барча футболчилар ичида Месси алоҳида босим остида бўлган, чунки ундан ҳар доим ва ҳамма жойда фақат ғалабалар кутилади. У яна ўзини ҳақиқий чемпион сифатида кўрсатди ва АҚШда чемпионликни қўлга киритди. Айтишларича, Пеле футболда жуда зўр эди. Айтингчи, ким зўрроқ: Пеле ёки Месси? Менимча, Месси кучлироқ", - деди Трамп Оқ уйнинг ижтимоий тармоқдаги расмий аккаунти томонидан уюштирилган жонли эфирда.

2022 йилда 82 ёшида вафот этган собиқ ҳужумчи Пеле Бразилия терма жамоаси таркибида уч карра жаҳон чемпиони бўлиб, у билан 1958, 1962 ва 1970 йилларда мундиални қўлга киритган. 38 ёшли Лионель Месси Аргентина терма жамоаси сафида 2022 йилги жаҳон чемпиони ва 2014 йилги жаҳон чемпионатининг кумуш медали совриндори ҳисобланади.