"Турон" Аҳмедов, Рўзиев, Давронов, Норбеков ва Мухторов билан шартнома тузди ва яна 2 нафар ўйинчиси билан келишув узайтирилди

“Турон” клуби декабрь ойидаги йиғин чоғидаёқ селекциядаги фаоллиги эвазига ўзи учун керакли футболчилар билан келишувларга эришишда давом этмоқда.

Бу борада “Турон” клуби матбуот хизмати бир қатор янги ўйинчилар билан шартномалар имзоланганлиги ҳақида эълон қиляпти. Жумладан, “Навбаҳор”ни тарк этган Азим Аҳмедов ва дарвозабон Раҳим Давронов билан бир йиллик шартномалар тузилди.

Шунингдек, “Қўқон-1912” билан хайрлашган Қувондиқ Рўзиев ҳамда Шохназар Норбеков билан ҳам мавсум охирига қадар келишувларга эришилди.

Қолаверса, “Локомотив” шарафини ҳимоя қилган Хуршид Мухторов ҳам “Турон” билан бир йилга мўлжалланган шартнома тузди.

Бу ҳали ҳаммаси эмас. “Турон” икки нафар ўйинчиси билан ҳамкорликни яна давом эттиради. Жумладан, Билолхон Тошмирзаев билан Ҳумоюн Муртазоев икки йиллик шартномага имзо чекишди.

Бундан олдин “Машъал” посбони Достонбек Тўхтабоев билан ҳам келишувга эришилганлиги тўғрисида хабар бергандик. “Турон” бу трансферлар билан чекланиб қолмоқчи эмас. Боиси, яна янги футболчилар билан музокаралар давом этяпти.