УЕФА “Барса” босим қилаётган ҳакам тақдирини ҳал қилди

Европа Чемпионлар лигаси ярим финал жавоб учрашувида “Барселона” футболчилари “Интер”дан қўшимча вақтда мағлубиятга учраб, мусобақани тарк этишга мажбур бўлди.

Бироқ каталонияликлар ўз муваффақиятсизлигида учрашувни бошқарган польшалик рефери Шимон Марцинякни айбламоқда.

Европа футбол ассоциациялари уюшмаси – УЕФА “Барселона” бош мураббийи Ханс-Дитер Флик ва бир неча ўйинчилар томонидан танқид остиг олинган ҳакамни тўлиқ қўллаб-қувватлашини билдирди.

Marca нашрининг ёзишича, халқаро ташкилот мутасаддилари бўлиб ўтган учрашув бўйича Шимон Марцинякка ҳеч қандай эътироз йўқлигини маълум қилган.

Эслатиб ўтамиз, драматик тарзда кечган ўйиндан кейин испанияликлар ҳимоячиси Иньиго Мартинес Марциняк бошқарувдаги ҳакамликни шармандалик эканини таъкидлаган эди. Бош мураббий Ханс-Дитер Флик эса, учрашувдаги барча қарорлар “Интер” фойдасига чиқарилганини даъво қилган.