УЕФА ФИФА ва Инфантинони судга бериши мумкин

Европа футбол ассоциациялари иттифоқи (УЕФА) Халқаро футбол федерацияси (ФИФА)га расмий хат юбориб, жаҳон чемпионати ва бошқа йирик мусобақалар телехуқуқларининг бир қисмини хусусий инвесторларга сотиш уринишлари бўйича судга мурожаат қилиш нияти борлигини маълум қилди.

ФИФА президенти Жанни Инфантино номига йўлланган мурожаатда ташкилотдан ҳуқуқларни ўтказишга оид режалаштирилаётган битимга тааллуқли барча ҳужжат ва материалларни сақлаб қолиш талаб қилинган. Нашр этилган маълумотларга кўра, ушбу хат нусхаси лойиҳага эҳтимолий инвесторлар консорциуми билан боғланаётган Жошуа Кушнерга ҳам юборилган.

Аввалроқ ФИФА йирик мусобақалар бўйича тижорат ҳуқуқларини бошқариш ва ташкилот даромадларини ошириш мақсадида FIFA Forward Enterprises номли янги тузилма тузиш режасини эълон қилган эди. Ушбу ташаббус УЕФА, КОНКАКАФ ва Осиё футбол конфедерацияси (АФК) каби қатор минтақавий ташкилотлар норозилигига сабаб бўлди. Кейинги кунларда ФИФА ушбу режанинг дастлабки вариантидан воз кечганини маълум қилди.