UFC 324: Йилнинг очилиш турнири, аёллар тоифасида тарихий тўқнашув, енгил вазнда вақтинчалик камар учун жанг, салом "Paramount", алвидо ESPN!

Хабарингиз бор, 2026 йилнинг илк рақамли турнири 24 январь куни ўтказилади. Мухлислар йилни очиб берувчи кечанинг ҳам спорт тарафлама, ҳам шоу тарафлама юқори даражада бўлишини кутимоқда. Хўш, бу турнир кутилмаларни оқлайдими? Қуйида ушбу саволга жавоб топишга ҳаракат қиламиз.

14 июнь куни UFC Оқ Уйда ташкил этилишини, у ерда Трампнинг 8-9 камар жанги ўтказилишини истаётганини инобатга олсак, бу йил бошқа турнирларда 1 донадан кўп титул баҳслари бўлиши жуда қийин. Буни "UFC 325" да атиги бир дона камар жанги режалаштирилаётганлиги ва UFC 326 да фақатгина BMF камар жанги борлигидан ҳам билишимиз мумкин. Бу ракурсдан олиб қарасак, Дана Уайтнинг йилни очиб берувчи, қолаверса, "Paramount" билан тузилган янги шартноманинг илк турнирига икки титул жанг қўйиб, не қадар жиддий ёндашганини билиб олишимиз мумкин, гарчи улардан бири вақтинчалик камар учун бўлса-да.

Иккинчи марказий жанг аёллар тоифасида тарихдаги энг зўр аёл спортчилардан бири – Аманда Нуньес ва амалдаги чемпион Кайла Хариссон ўртасида бўлиб ўтади. Баъзи экспертларнинг фикрига кўра, ушбу баҳс аёллар тоифасида тарихдаги энг марказий жанг, дея эътироф этилмоқда ва бунга етарлича сабаблар бор. Баъзи экспертлар эса мазкур тўқнашувни кечанинг биринчи марказий жанги бўлиши кераклигини иддао қилишмоқда. Чунки Аманда нафақадан қайтди, ҳатто ҳануз эски ҳайбатини йўқотгани йўқ, Кайла эса айни дамда UFC нинг энг ёрқин юлдузларидан бири. Услубларига тўхталадиган эрсак, Аманда базаси бокс, Кайланики эса дзюдо. Мазкур "жумлада" фаворит Кайладек гўё. Ҳатто Аманда Жулианна Пеньяга қарши баҳсда бўғиш услуби сабаб таслим бўлган эди. Шу боис кичик устунлик Харрисонда дейиш мумкин.

Кечанинг марказий жанги эса Жастин Гэтжи ва Пэдди Пимблет ўртасида енгил вазнда "interm" камари учун кечади. Тўғри, ушбу қарор UFC оммасини бироз ранжитди. Бироқ Дана айнан мана шу тўқнашувни бош жанг сифатида мухлисларга тақдим этмоқчи, зеро иккиси ҳам UFC даги деярли барча баҳсларида ё “Кечанинг перформанси”, ёки “Кечанинг жанги” бонусларини қўлга киритишмоқда. "Paramount" билан тузилган янги шартнома учун ҳам бу қарама-қаршилик айни муддао саналади.

Жастиннинг баъзаси кураш бўлишига қарамай, тик оёқда уришишни ёқтиради. Ҳатто интервьюларининг бирида кураш одамни чарчатиб юборишини, тик оёқда ҳам чарчаш мумкин эканлигини, аммо танлов имконияти бўлса, тик оёқда жанг қилиб чарчашни афзал кўришини айтганди. Профессионал ММА карьерасидаги 26 ғалабасининг 20 таси NO/TKO дир, бор-йўғи бир донаси сабмишн билан. Гурзидек муштлари ва тепкилари, қолаверса тепкиларга бўлган собит ҳимояси, ғалабаларининг аксарини октагон панжарасидан шаталоқ отиб нишонлаши, ҳар жангида “кафолатланган” шоулар уни мухлисларнинг ёқимтой спортчисига айлантирган.

Пэдди ҳам партерда, ҳам "стойка"да хавфли экани билан эътиборни ўзига тортмоқда. У ҳар жабҳада ўзини кўрсатишни яхши кўради. UFC даги 7 жангининг бештасида “Кечанинг перформанси” бонусини қўлга киритган. У нафақат жанг пайти, балки ундан ташқарида ҳам шоуларни севади. Треш-токлардаги сўзамоллиги, рақс тушиши, мухлисларни жўшқинлантира олиш қобилияти унинг энг муҳим хусусиятлари саналади. Ливерпулда туғилиб, "Ливерпуль" футбол клуби мухлиси бўлган одамдан бошқа нарса кутиш мумкинми ўзи?!

Пимблетт ўзи қаршилашган исмларнинг кўпини UFC да нафақага чиқармаган бўлса-да, нафақага яқинлаштирди. Жастинни ҳам уларнинг қаторига ёзсак бўлаверади. Одатда "ветеранлар" билан баҳс олиб боряпти. Лекин Гэтжи аввалги қарияларга ўхшамайди. Ушбу тўқнашувнинг ғолиби Илия Топуря билан курашиши керак бўлади. Ана шу баҳс Оқ Уйнинг энг муҳим жангларидан бири бўлади, назаримизда!

Азизбек ҒОЗИЙ тайёрлади