UFC Қатарда дебют қилади!

UFC тарихда илк бор Қатар тупроқларини зиёрат этади. Этганда ҳам супер зиёрат бўлиши кутиляпти. Ўзбекистонлик мухлисларни қизиқтириш мумкин бўлган жанглар ва воқеликлар бисёр. Қуйида уларнинг барчасини таҳлил қиламиз.

Дастлаб, кечанинг энг кульминацион жангига эътибор қаратайлик. Бу ерда Арман Царукян Дэн Хукер билан кураш олиб боради. Дана Уайтнинг айтишича, енгил вазн чемпионлик камари учун биринчи рақамли даъвогар мана шу баҳсда аниқланади. Амалдаги чемпион Илия Топурия эканини инобатга олсак, Дана Уайт унга кимни рақиб этиб танлашда боши роса қотяпти. Бир тарафда енгилмас Ислом Махачев, бир тарафда шоумен Педди Пимблет, бир тарафда фаолиятини тугатиш ила таҳдид қилаётган Жастин Гэтжи, бир тарафда барча қочаётган Арман Царукян, бир тарафда барчанинг қочаётганидан қўрқмаётган Дэн Хукер, бир тарафда қасос ўтида ёнаётган Чарльз Оливейра, бир тарафда ММА афсонаси Макс Холлоуей... Мана шу жангнинг ғолиби эса барча номзодларнинг лидери бўлиши кутилмоқда.

Икки жангчи ҳам анчадан бери октагонга чиқмади, лекин Арман грэпплинг турнирларида қатнашиб турди. Ижтимоий тармоқларда эса унинг нақадар фаол машғулот қилаётганини, қолаверса, машғулот партнёрлари орасида Хамзат Чимаевнинг бор эканини инобатга олсак, ушбу жангда Царукяннинг имкониятлари кўпроқлигини англашимиз мумкин. Биргина бу эмас, Хамзат Чимаев уни қўллаб-қувватлаш учун Қатарга қадам ранжида қилиши кутиляпти (ҳали кимлар-кимлар Қатарга келиши мумкин эканлиги рўйхати бу ерда тугамади). Дрикус дю Плессига қарши баҳсда Хамзатни қўллаш учун Арман келгани ҳам ёдингизда бор.

Дэн Хукер кикбокс орқали, Арман Царукян эса эркин кураш орқали аралаш жанг санъатларига кириб келган. Янги Зеландиялик жангчи кўпроқ масофани ушлашга ва ҳаракатчан бўлишга мажбур, йўқса Арман кураши билан ерда Хукерга имкон қолдирмайди, шунингдек, Арман оёқ билан ишлаш борасида анча моҳир, зарбалари жуда кучли.

Иккинчи жангимиз эса Белал Муҳаммад ва Иан Гарри ўртасида бўлиб ўтади ва бу жанг уч раунд давом этади, холос. Нега бу нуқтага тўхталдим, ҳозир айтаман. Белал 37 ёшда бўлса, Иан Гарри 28 ёш. Уларнинг орасида деярли 10 ёш фарқ бор. Ҳа, Белал собиқ чемпион, лекин Мачадо UFC га шов-шувли кириш амалга оширди. У аввал собиқ чемпионни енгиб, кейин амалдаги чемпион Ислом Махачевга чақирув амалга оширмоқчи. Кейин эса илк камар ҳимоясида Шавкат Раҳмонов билан уришиб, карьерасидаги доғ бўлиб турган ягона мағлубияти ўчини олмоқчи. Жанг беш раунд бўлганида Белалнинг имкониятлари бироз камайиши мумкин эди, лекин уч раунд экани боис бу тўқнашув ғолиби ҳақида фикр билдириш бироз қийин. Аммо Гарри ушбу қарама-қаршиликка фаворит сифатида ташриф буюрмоқда.

Бир инсон чемпионлик камарини бой берар экан, кейинги жангдаги туйғулари қандай бўлади?! Табиийки, ғалабага ташна. Албатта, Белалнинг камарни бой берганидан кейин октагонга қай тарзда қайтиши барчамизга қизиқ.

Бу жанг ҳам юқоридагидек бирламчи контендер жанги ҳисобланади. Зеро ярим ўрта вазн чемпиони Ислом Махачевга ҳам мос рақиб топиш осон емас, илло бир рақиб топилиши аниқ, лекин у рақибнинг Ислом билан жанг қилиш савиясида бўлиб-бўлмаслиги сўроқ остида. Бу жангни ютиб, Гарри биринчи рақамли номзодга айланади. Шояд Белал ютса, ишлар бироз қизишади. Белал-Ислом жанги ташкил этиладими? Белал буни исташи мумкин, аммо Ислом буни истайдими? Икки мусулмон жангчи баҳсига аввалдан қарши чиққан Махачев, бу сафар принспларидан воз кечадими? Бу саволларнинг барчасига жараённи кузатибгина жавоб олишимиз мумкин.

Яна бир кураш Илия Топуриянинг акаси Александр Топурия ва Бекзат Алмахан ўртасида бўлиб ўтади. Александр Топуриянинг бурчагида укаси Илия ҳам бўлади, Бекзат Алмаханнинг бурчагида катта ном бўлмаслиги мумкин, аммо ортида 6 туркий мамлакат мухлислари бор, жумладан, ўзбекистонликлар ҳам.

6 туркий халқларнинг мухлислари нафақат Бекзатнинг, балки Мыктыбек Оролбой, Абдулраҳман Яхьяев ва Асу Алмабаевларнинг-да ортида бўлишади.

Яна бир эътиборга молик жанг тожикистонлик Нурулло Алиев ва Шем Рок ўртасида ўтказилади. Нуруллони ҳам беш Марказий Осиё мамлакатлари мухлислари қўллаб-қувватласа, Шем Рок ва Богдан Градга қарши жанг ўтказадиган Луке Рилейларнинг бурчагида жамоадошлари Педди Пимблет бўлади. Шоумен Педди ва Илия Топурия орасида Қатар тупроқларида бир шоу гувоҳига ҳам айланишимиз мумкин. Ёки Илия-Ислом атрофида ака-ука Топурия ва Ислом, Хабиб, Тагирлар жанжали.

Тагир Уланбеков бурчагида эса Ислом ва Хабиб бўлиш эҳтимоли мавжуд. Зеро улар Тагирнинг деярли барча жангларида бурчагидан ўрин олган еди.

Ушбу воқеликларнинг барчаси Қатарда 22 ноябрь куни соат 20:00 да, асосий кард эса 23:00 да бошланади. Барча жараённи биз билан кузатиб боринг! 

Азизбек ҒОЗИЙ тайёрлади