Улар Роналду ва Мессини “тахт”дан туширишга тайёрланмоқда

Словения ва Венгрияда бўлиб ўтган 21 ёшгача бўлган футболчилар ўртасидаги Европа чемпионатининг гуруҳ босқичига 92 нафар футболчи ташриф буюрди. Улар орасида Европанинг кучли бешлик чемпионатида тўп сурадиган таниқли футболчилар ҳам бор, аммо ҳақиқий супер юлдузлар турнирга келмади.

Мусобақа афишаси эълон қилингандан сўнг? Мейсон Гринвуд асосий юлдуз бўлиши керак эди, аммо Transfermarkt портали 50 миллион еврога баҳолаган "Манчестер Юнайтед" ҳужумчиси кутилмаганда жароҳат олди ва Англия ёшлар терма жамоаси қароргоҳини тарк этди. Унинг ўрнига "Норвич" ярим ҳимоячиси Тодд Кантвелл чақирилди. Бу йигит жуда зўр ва ўтган мавсум премьер-лигада порлаган ("гол+пас" тизимида 6+2). Лекин барибир у машҳурлик борасида Гринвуд даражасига етиб бормаган. Эҳтимол, Мейсон 31 май - 6 июнь кунларига белгиланган плей-офф босқичида иштирок этиши мумкиндир (агар Англия у ерга борадиган бўлса).

"Манчестер Юнайтед" ҳужумчиси кетганидан сўнг, ёшлар ўртасидаги Европа чемпионатининг асосий юлдузини танлаш анча қийинлашди. Бу номга испаниялик Рики Пуч даъвогарлик қилмоқда, гарчи у “Барселона”да захира ўриндиғида ўтирган бўлса ҳам. Бу қаторга яна “Ренн” ярим ҳимоячиси Эдуардо Камавинга, "Барселона" ҳужумчиси Франсишку Тринкан ва "Челси" ҳужумчиси Каллум Хадсон-Одоини қўшиш мумкин.

“Евро-2021”да кучли чемпионатларда тўп сурадиган бошқа ёш футболчилар ҳам кўп. Албатта, улар ҳам тез орада ярқ этиб порлаб чиқишади.

Ушбу турнирда иштирок этишнинг асосий мезони ёшдир. Унда 1998 йил 1 январдан кейин туғилган ҳар қандай ўйинчи U-21 қитъа чемпионатида қатнашиш ҳуқуқига эга. Transfermarkt портали талқинига кўра, дунёнинг энг қиммат футболчилари ўнталигидан жой олган 4 нафар футболчи ушбу мусобақада иштирок этиши мумкин эди, аммо негадир улар келмади.

Биргина Англия терма жамоаси АПЛ ва Бундеслигада порлаётган Жейдон Санчо, Трент Александр-Арнольд, Фил Фоден, Букаё Сак, Деклан Райс, Мейсон Маунт, Рис Жеймс ва Жуд Беллингем каби юлдуз футболчиларни жалб қилиши мумкин эди. Улар орасига таркибга чақирилган Мейсон Гринвуд ва Каллум Хадсон-Одоини ҳам қўшсангиз, катталар ўртасидаги Европа чемпионатида ҳам медаллар учун курашадиган жамоа пайдо бўлганини кўрасиз.

Бир неча ўнлаб машҳур футболчиларнинг ушбу Европа ёшлар чемпионатига келмасликларига бир нечта сабаб бор. Энг асосийси - улар аллақачон миллий терма жамоага чақирилган. Санчо (жароҳати бор), Трент Александр-Арнольд (у ҳақида кейинроқ), Мбаппе, Педри, Де Лигт, Доннарумма, Хавертц, Фелиш, Торрес, Нето ва Кин. Ушбу футболчилар миллий жамоада ўз ўрнини топган ва тенгдошлари билан нисбатан пастроқ даражадаги мусобақаларда иштирок этишни хоҳламайди.

Миллий терма жамоа чақириғи туфайли, ҳатто “Евро U-19”да қатнашадиган баъзи йигитлар ҳам Венгрия ва Словенияга келмади. Масалан, Йоахим Лёв Флориан Виртцни (17 ёшу 10 ойлик) ва Жамол Мусиалани (18 ёшу 26 кунлик) Бундестимга таклиф қилди.

Трент воқеаси алоҳида мавзу. Ҳа, у анчадан буён асосий жамоа ўйинчиси ва эҳтимол, Англиянинг энг яхши ўнг қанот ҳимоячиси сифатида фаолият юритиб келмоқда, аммо Гарет Саутгейт сўнгги пайтларда кўрсатаётган суст ўйини туфайли уни “ЖЧ-2022” саралаш баҳсларига чақирмади. Ва у буни қуйидагича изоҳлади: «Трент охирги пайтларда сўнгги бир неча йил ичида кўрсатган юқори даражасини кўрсата олмаяпти. У катта истеъдодга эга. Ишончим комилки, у келажакда Англия терма жамоасида муҳим роль ўйнайди".

Турнирда Эрлинг Холанд ва Мартин Эдегорнинг йўқлигига сабаб, Норвегия ёшлар терма жамоаси мусобақа саралашида муваффақиятсизликка учради ва финал босқичига чиқа олмади.

Турнирнинг бир нечта супер юлдузларга айланишига тўсқинлик қилган яна бир омил бу жароҳатлар эди. Масалан, 2019/20 йилги мавсумда "Лион"ни Чемпионлар Лигаси ярим финалига олиб чиққан Уссема Ауар мусобақага чақирилган эди, аммо кейинчалик Мусса Диаби билан биргаликда улар жароҳати туфайли таркибдан чиқди. Худди шу сабабга кўра, Константин Кучаев Россия терма жамоасини тарк этди, унинг ўрнига улар "Динамо" ҳужумчиси Константин Тюкавин чақирилди. Португалияликлар эса "Милан"даги Рафаэль Леонга муҳтожлик ҳис қилишди.

Ёшлар ўртасидаги “Евро-2021” мусобақасида асосий юлдузларнинг йўқлигига сабаблари жуда кўп, аммо асосийси шуки, замонавий футболда ёш йигитлар ўз ёш тоифасидаги турнирлар ўтказилишидан олдин ҳам етакчи бўлиб улгурмоқда. Улар асосий жамоалар учун УЕФА кутгандан ҳам олдинроқ қўшилмоқда ва ҳаттоки Мбаппе сингари 19 ёшидаёқ катталар ўртасида жаҳон чемпиони бўлганлар бор. Футбол тобора ёшариб бормоқда ва аллақачон Роналду ва Месси каби юлдузларни “тахт”дан туширишга тайёрланаётганлар бўй кўрсатмоқда.