Хедира: "Хабининг тизими Винисиусни анча чеклаб қўйди"

"Реал Мадрид"нинг собиқ ўйинчиси Сами Хедира жамоанинг собиқ мураббийи Хаби Алонсо ва Винисиус Жуниор ўртасидаги келишмовчилик сабабини тушунтирди. Испаниялик мураббий январ ойида, тайинланганидан атиги олти ой ўтгач, ишдан бўшатилган эди.

"Карло Анчелотти "Реал"да бўлганида, Вини "Олтин тўп"га яқин эди ва бу мукофотга тўлиқ лойиқ эди. Хабининг тизими уни анча чеклаб қўйди, чунки Алонсо жамоавий тузилмани индивидуал ўйинчилардан устун қўйишга одатланган эди. Арбелоа билан Винисиус яна эркинликка эга бўлди - ва биз бу унга қандай таъсир қилаётганини аллақачон кўриб турибмиз", - дея Хедиранинг сўзларини келтиради "Madrid Zone".

Эслатиб ўтамиз, Винисиус Жуниор "қаймоқранглилар" сафидаги сўнгги тўртта ўйинида бешта гол урди.