Холанд эҳтиросга берилиб катта гапириб қўйди

“Манчестер Сити” ҳужумчиси Эрлинг Холанд жамоанинг мавсум охирида яна очко йўқотишига ҳиссий муносабат билдириб, клуб янги чемпионат олдидан омадсизликларни қўшимча мотивацияга айлантириши кераклигини айтди.

- Охир-оқибат, Премьер-лигадаги ҳар бир ўйин қийин эканини кўрдик. Биз охиригача ҳаракат қилдик. Аммо бу етарли бўлмади. Энди бутун клуб бундан мотивация сифатида фойдаланиши керак. Биз ғазабланишимиз, ичимиздаги оловни ҳис қилишимиз керак, чунки бу натижалар етарли эмас.

Икки йил ўтиб кетди, аммо бу бутун бошли абадийликдек туюлмоқда. Кейинги мавсумда чемпионликни ютиш учун қўлимиздан келган барча ишни қиламиз, - деди Холанд.

Унинг сўзларини клуб матбуот хизмати келтирган.

АПЛ тугашига бир тур қолганида “Манчестер Сити” иккинчи ўринда бормоқда. Гвардиола шогирдлари 37 та ўйинда 78 очко тўплаган ва пешқадам “Арсенал”дан тўрт очко ортда қолиб, ҳатто назарий чемпионлик имкониятини ҳам йўқотган.